Qazaqstan Respýblikasy Syrtqy ister ministri Ermek Kósherbaev AQSh Memlekettik hatshysynyń Ońtústik jáne Ortalyq Aziia isteri jónindegi kómekshisi Pol Kapýrdy qabyldady, dep habarlaidy dalanews.kz.
Kezdesý barysynda taraptar ekijaqty yntymaqtastyqtyń ózekti máselelerin, sondai-aq Qazaqstan men AQSh arasyndaǵy keńeitilgen strategiialyq áriptestikti odan ári nyǵaitýdyń perspektivalaryn talqylady.
E.Kósherbaev suhbattasyn Qazaqstanda júzege asyrylyp jatqan saiasi jáne áleýmettik-ekonomikalyq ózgerister týraly habardar etip, eldiń damýdaǵy jańa kezeńge qadam basqanyn atap ótti. Osyǵan bailanysty 23 tamyzda ótetin Quryltai sailaýy jańa konstitýtsiialyq modeldi is júzinde iske asyrýdaǵy mańyzdy kezeń bolatyny atalyp ótti.
Óz kezeginde, amerikalyq tarap yntymaqtastyqty odan ári nyǵaitýǵa múddeliligin rastady jáne energetika, mańyzdy mineraldar, ozyq tehnologiialar, tsifrlandyrý, kólik jáne investitsiialar salalaryndaǵy praktikalyq ózara is-qimyldy keńeitý úshin eleýli áleýet bar ekenin atap ótti.
Sý resýrstaryn basqarýdyń jahandyq arhitektýrasyn nyǵaitý jónindegi Qazaqstannyń bastamasyna, onyń ishinde Qazaqstan Respýblikasy Prezidenti Qasym-Jomart Toqaevtyń BUU-nyń mamandandyrylǵan mekemesi retinde Halyqaralyq sý uiymyn qurý týraly bastamasyna erekshe nazar aýdaryldy.
Kezdesý barysynda sondai-aq 2026 jylǵy jeltoqsanda Maiami qalasynda ótetin «G20» sammitine daiyndyq máseleleri jóninde pikir almasyldy. Sammitke Memleket basshysy AQSh Prezidenti Donald Tramptyń shaqyrýymen qatysady. Osyǵan bailanysty taraptar joǵary deńgeidegi kún tártibin mazmundy túrde qalyptastyrý maqsatynda odan ári ózara is-qimyl jasaýǵa daiyn ekenderin bildirdi.
