AQSh prezidenti Donald Tramp qarasha aiynda Qytaida ótetin Aziia-Tynyq muhity ekonomikalyq yntymaqtastyǵy (ATES) sammiti aiasynda Qytai jáne Resei basshylarymen úshjaqty kelissóz júrgizýge qarsy emes. Bul týraly ol 19 qazanda jýrnalisterge málimdedi, dep habarlaidy dalanews.kz.
Tramp ázirge mundai kezdesýge resmi kelisim bermegenin aitty. Alaida Qytai tóraǵasy Si Tszinpin men Resei prezidenti Vladimir Pýtin úshjaqty kelissóz ótkizýdi qalasa, oǵan qatysýǵa daiyn ekenin jetkizdi.
AQSh prezidentiniń sózinshe, kezdesýde úsh eldiń iadrolyq qarýdan bas tartý máselesi talqylanýy múmkin. Sonymen qatar Ýkrainadaǵy soǵys ta kún tártibine enýi yqtimal. Tramptyń pikirinshe, bul máseleni Ýkraina prezidenti Vladimir Zelenskiidiń qatysýynsyz da talqylaýǵa bolady.
Buǵan deiin, dúisenbi kúni, The Wall Street Journal basylymy Tramp, Si Tszinpin jáne Pýtinniń úshjaqty kezdesýi múmkin ekenin habarlaǵan. Basylym derekkózderiniń málimetinshe, mundai bastamany Pýtin kótergen. Ol Ýkrainadaǵy soǵysty talqylap, Resei usynǵan beibitshilik sharttaryna qoldaý izdeýi múmkin.
WSJ málimetinshe, Resei prezidenti bul usynysty 9 qazanda Tramppen telefon arqyly sóilesken kezde aitqan. Kremldiń baspasóz hatshysy Dmitrii Peskov ta úshjaqty kezdesý ótkizý múmkindigi qarastyrylyp jatqanyn rastady.
Alaida Ýkraina syrtqy ister ministri Andrei Sibiga mundai formattaǵy kezdesýge jáne onda Ýkraina máselesiniń talqylanýyna qarsy ekenin bildirdi. Eýropalyq odaq ókilderi de bul bastamaǵa qatysty alańdaýshylyq tanytty.
