Elimizde “Nelegal” is-sharasy barysynda kóshi-qon zańnamasyn buzýdyń 15,8 myńnan astam deregi anyqtaldy, dep habarlaidy dalanews.kz.
5–16 qazan aralyǵynda Qazaqstan aýmaǵynda qoǵamdyq tártipti qamtamasyz etýge, kóshi-qon zańnamasyn buzýshylyqtardyń aldyn alýǵa jáne jolyn kesýge, sondai-aq shetel azamattarynyń elde bolý qaǵidalaryn saqtaýyn baqylaýdy kúsheitýge baǵyttalǵan “Nelegal” jedel-profilaktikalyq is-sharasy ótkizildi.
Is-shara aiasynda politsiia qyzmetkerleri jeke jáne zańdy tulǵalar arasynda profilaktikalyq jumystar júrgizip, kóshi-qon zańnamasynyń talaptaryn jáne olardy buzǵany úshin kózdelgen jaýapkershilikti túsindirdi. Shetel azamattaryna turǵyn úi berý, olardy tirkeý tártibin saqtaý jáne sheteldik jumys kúshin zańsyz tartýǵa jol bermeý máselelerine erekshe nazar aýdaryldy.
Sonymen qatar shetel azamattary shoǵyrlanyp turatyn oryndar, qurylys nysandary, bazarlar, sondai-aq sheteldik jumysshylardyń eńbegin paidalanatyn kásiporyndar men uiymdar tekserildi. Operatsiia qorytyndysy boiynsha kóshi-qon zańnamasy salasynda 15,8 myńnan astam quqyq buzýshylyqtyń joly kesildi.
Qazaqstanda bolý qaǵidalaryn buzǵany úshin 7 595 shetel azamaty ákimshilik jaýapkershilikke tartyldy. Eńbek qyzmetin zańsyz júzege asyrǵany úshin taǵy 3 899 shetel azamatyna qatysty sharalar qabyldandy. Tiisti ruqsattarsyz sheteldik jumys kúshin tartqany úshin 815 jumys berýshige qatysty sharalar qoldanyldy. Sondai-aq shetel azamattarynyń ózderinde bolýy týraly ishki ister organdaryna ýaqtyly habarlamaǵan 3 533 jeke jáne zańdy tulǵa jaýapkershilikke tartyldy.
Sottar kóshi-qon zańnamasyn buzǵan adamdardy Qazaqstan aýmaǵynan shyǵarý týraly 2 243 sheshim shyǵardy. Budan bólek, elde odan ári bolýyna jol berilmeidi dep tanylǵan 2 479 shetel azamatynyń elde bolý merzimi qysqartyldy. Májbúrlep elden shyǵarý sharasy 236 shetel azamatyna qatysty oryndaldy. Olardyń barlyǵyna Qazaqstanǵa bes jyl merzimge kirýge tyiym salyndy.
Tekserý barysynda memlekettik shekarany zańsyz kesip ótken 14 shetel azamaty da anyqtaldy. Atalǵan faktiler boiynsha shekara qyzmetimen birlesip tergep-tekserý jumystary júrgizilip jatyr. Sonymen qatar izdeýde júrgen jáne óz memleketteriniń quqyq qorǵaý organdarynan Qazaqstan aýmaǵynda jasyrynyp júrgen 62 shetel azamaty ustaldy.
Anyqtalǵan quqyq buzýshylyqtardy taldaý zańsyz kóshi-qonnyń negizgi sebepteriniń biri jekelegen azamattardyń zańda belgilengen talaptardy ainalyp ótip, tez paida tabýǵa umtylýy ekenin kórsetedi. Birqatar jaǵdaida sheteldikterdiń elge zańsyz kirýine Qazaqstan azamattarynyń ózderi yqpal etip, olardyń elde bolýyn uiymdastyrady, turǵyn úimen qamtamasyz etedi jáne qajetti ruqsat qujattarynsyz eńbek qyzmetine tartady.
Máselen, Almaty oblysynda kóshi-qon zańnamasyn buzǵan sheteldikterge turǵyn úi berip, zańsyz kóshi-qondy uiymdastyrdy degen kúdikpen Qazaqstan azamaty ustaldy. Osyndai faktiler Jambyl jáne Pavlodar oblystarynda da anyqtaldy.
Operatsiia barysynda sheteldik jumys kúshin zańsyz paidalanýdyń jolyn kesýge erekshe nazar aýdaryldy. Máselen, Shymkent qalasyndaǵy qurylys nysandarynyń birinde tiisti ruqsattarsyz eńbek qyzmetin júzege asyrǵan 40-qa jýyq shetel azamaty anyqtaldy.
Osyndai zań buzýshylyqtar Almaty qalasynda, sondai-aq Qaraǵandy, Almaty, Atyraý, Mańǵystaý, Shyǵys Qazaqstan, Qostanai jáne Soltústik Qazaqstan oblystarynda da tirkeldi. Barlyq jaǵdaida sheteldik jumysshylar men jumys berýshilerge qatysty zańnamada kózdelgen sharalar qabyldandy.
Budan bólek, bir jyl ishinde sheteldik jumys kúshin tartýdyń belgilengen tártibin eki nemese odan da kóp ret buzǵan 10 jumys berýshige qatysty tergep-tekserý bastaldy. Qaitalanǵan quqyq buzýshylyqtar úshin olarǵa Qazaqstan Respýblikasynyń zańnamasyna sáikes qylmystyq jaýapkershilik kózdelgen.
Sondai-aq qoǵamdyq tártipti júieli túrde buzatyn jáne elde belgilengen minez-qulyq normalaryn qurmettemeitin shetel azamattaryna erekshe nazar aýdaryldy. Atap aitqanda, kóshi-qon zańnamasyn buzýǵa qatysy joq, alaida birneshe ret ózge de quqyq buzýshylyqtar jasaǵan, sonyń ishinde balaǵat sózder aityp, qoǵamdyq tártipti buzǵan adamdar týraly sóz bolyp otyr.
Mundai azamattardy Qazaqstan aýmaǵynan shyǵarý týraly politsiia sottarǵa 31 ótinishhat joldady. Tiisti sharalardy qoldaný bastamasy Shymkent qalasynda, Almaty qalasynda, sondai-aq Abai, Aqtóbe, Almaty, Mańǵystaý, Qostanai jáne Túrkistan oblystarynda kóterildi. Eger sottar elden shyǵarý týraly sheshim qabyldasa, atalǵan shetel azamattaryna Qazaqstan aýmaǵyna bes jyl merzimge kirýge tyiym salynady.
