Tarazda mekteptegi tóbelesten keiin 10-synyp oqýshysyn bir kózinen aiyrǵan jasóspirimge úkim shyqty, dep habarlaidy dalanews.kz KTK telearnasyna silteme jasap.
Jambyl oblysynyń kámeletke tolmaǵandar isteri jónindegi mamandandyrylǵan aýdanaralyq soty aiyptalýshyny jeti jylǵa bas bostandyǵynan aiyrdy.
Oqiǵa biyl sáýir aiynyń ortasynda Tarazdaǵy gimnaziialardyń birinde bolǵan. Tergeý málimetinshe, úzilis kezinde 10-synyp oqýshysy Damir Suranshiev pen birneshe toǵyzynshy synyp oqýshysynyń arasynda janjal týyndaǵan. Buǵan olardyń bir-birin iyǵymen qaǵyp ketýi sebep bolǵan.
Keiin Damirdi er balalardyń kiim aýystyratyn bólmesine shaqyrǵan. Sol jerde janjal tóbeleske ulasyp, oqýshy aýyr jaraqat alǵan.
"Jábirlenýshi soqqy saldarynan aýyr dene jaraqatyn alyp, bir kóziniń kórý qabiletinen tolyq aiyryldy. Sot úkimimen K. kináli dep tanylyp, jeti jylǵa bas bostandyǵynan aiyryldy. Úkim zańdy kúshine engen joq", - dep habarlady sot ókilderi.
Isti tergeý men sot protsesi jeti aiǵa sozylyp, jabyq jaǵdaida ótti. Tóbeleske birneshe adamnyń qatysqany aitylǵanymen, sot aldynda bir ǵana jasóspirim jaýap bergen. Buǵan deiin úiqamaqta bolǵan sottalýshy úkim jariialanǵan soń sot zalynda qamaýǵa alyndy. Ol taǵylǵan aiypty ishinara ǵana moiyndaǵan.
Jaraqat alǵan oqýshy osy ýaqytqa deiin jeti ret ota jasatqan. Anasynyń aitýynsha, qazir onyń ekinshi kóziniń de kórý qabileti nasharlap barady. Bolashaqta dáriger bolýdy armandaǵan jasóspirim aýyr jaǵdaidan keiin kúizeliske túsken.
Damirdiń anasy Zýhra Karimova sot sheshimimen tolyq kelispeitinin jáne apelliatsiialyq shaǵym túsiretinin málimdedi.
"Men apelliatsiiaǵa beremin jáne oqiǵaǵa qatysqandardyń barlyǵyn jaýapqa tartýdy talap etemin. Bul top bolyp jasalǵan shabýyl ekenin áýel bastan aityp kelemiz. Sondyqtan qalǵan qatysýshylar da jazalanýǵa tiis dep esepteimin", - dedi ol.
