AQSh prezidenti Donald Tramp eldiń eń iri qorǵanys kompaniialary qarý-jaraq óndirisin ulǵaityp, múmkindiginshe qysqa merzimde eń joǵary kólemge jetkizýge kirisetinin aitty, dep habarlaidy Dalanews.kz
Bul týraly amerikalyq kóshbasshy 6 naýryz, juma kúni Truth Social áleýmettik jelisinde jazdy. Ol bul málimdemeni qorǵanys salasyndaǵy iri kompaniia ókilderimen kezdesýden keiin jariialaǵan. Kezdesý barysynda qarý-jaraq óndirisiniń kólemi men ony shyǵarý kestesi talqylanǵan.
Tramptyń aitýynsha, jiynǵa BAE Systems, Boeing, Honeywell Aerospace, L3Harris Missile Solutions, Lockheed Martin, Northrop Grumman jáne Raytheon kompaniialarynyń bas direktorlary qatysqan.
Onyń sózinshe, atalǵan kompaniialar «ekskliýzivti sanattaǵy» qarý-jaraq óndirisin tórt esege arttyrýǵa kelisken.
«Biz múmkindiginshe tezirek eń joǵary óndiristik deńgeige jetýdi qalaimyz. Sondyqtan olar “ekskliýzivti sanattaǵy” qarý-jaraq óndirisin tórt ese ulǵaitýǵa kelisti», – dedi ol.
Aq úi basshysy óndiristi keńeitý jumystary bul kezdesýden úsh ai buryn bastalǵanyn atap ótti. Qazirdiń ózinde jańa zaýyttar salynyp jatyr, sondai-aq qarý-jaraqtyń kóptegen túrin shyǵarý jolǵa qoiylǵan. El boiynsha birneshe shtat jańa kásiporyndardy óz aýmaǵynda ornalastyrý úshin ózara básekege túsip otyr.
«Bizde, mysaly, Iranda paidalanatyn jáne jýyrda Venesýelada qoldanylǵan orta jáne joǵary orta sanattaǵy oq-dárilerdiń qory is júzinde sheksiz. Soǵan qaramastan, biz osy sanattaǵy oq-dárilerge beriletin tapsyrystardy da arttyrdyq», – dedi Tramp.
Sondai-aq ol bul kezdesýdiń qorytyndysy boiynsha taǵy bir jiyn ótkizý josparlanǵanyn, onyń eki aidan keiin ótetinin aitty.
