Onyń sózinshe, internette memlekettik tildiń reprezentatsiiasyn jasaý kerek.
Keibir memlekettik organdar men kvazimemlekettik kompaniialar internet saittarynyń qazaqsha nusqalaryna basymdyq bermeitinin, tipti áleýmettik jelilerdegi paraqshalarynda da qazaqsha jazýǵa kelgende qulyqty emes ekenin kóp baiqap júrmiz.
Keibir memlekettik organdardyń domendik ataýy memlekettik tilde jazylmaǵan. Odan basqa, elimizdegi ártúrli iri halyqaralyq jáne jergilikti kompaniialardyń internet saittarynan da, áleýmettik jelilerdegi paraqshalarynda da memlekettik tilge jetkilikti kóńil bólinbegenin ańǵarýǵa bolady.
Sondyqtan, internettegi til máselesine kóńil bólinip, memlekettik tilge qatysty talap qoiylyp, álgi saittar memlekettik tilde de jumys istese tildiń qoldaný aiasy áldeqaida keńeiip, ana tilimizdiń damýyna úlken oń áserin berer edi, – dedi ol.
Sonymen qatar, jastarmen jumysta jańa serpin kerek, degen ol taǵy bir máseleni qozǵady.
Jastarmen kezdesý úshin aimaqtarǵa barǵanda jii ushyrasatyn taǵy bir úlken problema-bilimdi, intellektýaldy, shyǵarmashyl jastardyń jinalatyn, kreativti ideialaryn damytýǵa múmkindik beretin klýbtar, kovorking ortalyqtar, qoǵamdyq oryndardyń joqtyǵy.
Bul problema aimaqtar túgili, tipti iri megapolisterde de áli sheshimin tapqan joq. Bilimdi jastardyń ortasyn qalyptastyrý úshin olarǵa bas qosatyn jer, jinalatyn orta qajet. Aýyl-aimaqtardy aralap júrip baiqaǵanym, ár aýyldan kem degende bir meiramhana, toihana ǵimaraty bolady. Al, bilim qýǵan, ǵylymǵa qyzyqqan jastarǵa arnalǵan ortalyq tabý qiyn.
Tipti kóp aýyldarda kitaphana da joq. Bolsa da ol kitaphanalarǵa óte eski ǵimarattar berilgen. Kitaphanalarǵa erekshe kóńil bólip, jastardy kitap oqýǵa baǵyttaýǵa kóbirek kóńil bólinse. Bilimimiz álemdik, tárbiemiz ulttyq bolýy kerek. Sosyn, stýdentter men jastardyń bizdiń elde keńinen tanylǵan boks pen kúresten basqa sport túrlerine qoljetimdiligi ózekti máselelerdiń biri.
Bizdiń joǵarǵy oqý oryndary stýdentterdiń túrli sport túrlerimen ainalysýyna eshqandai jaǵdai jasamaidy. Keibir ýniversitetterdiń fýtbol jáne basketbol oinaityn ǵana alańdary bolsa, keibireýlerinde múldem joq. Bar bolsa da únemi jabyq turady. Osy oraida, stýdentterge sportpen ainalysýǵa jaǵdai jasalsa, elimizdegi barlyq sport federatsiialary JOO-ymen memorandýmǵa otyryp, stýdentterge jeńildikter men qoldaýlar qarastyrsa. Ýniversitetterdi jattyqtyrýshylarmen qamtamasyz etse degen tilek bar, dep qosty Rojin.
