Buǵan deiin baspasóz ókilderimen tildesken Tótenshe jaǵdai ministri Iýrii Ilin tilsiz jaýdyń aldyn-alýdaǵy órt sóndirýshilerdiń janqiiarlyq eńbegin erekshe atap ótip, osy saladaǵy túitkildi máselelerge de toqtalǵan edi.
Ministrdiń atap ótkenindei biyl qyzyl jalynmen arpalysqan órt sóndirýshilerdiń jedel qimylynyń nátijesinde elimizdegi órttiń kórsetkishi byltyrǵy jylǵy sáikes kezeńmen salystyrǵanda 7-8 paiyzǵa tómendegen.
Áitse de, bul órttiń aldyn-alýdaǵy ahýaldyń túzelgenin bildirmeidi. Vedomstva basshysynyń málimetinshe, órt sóndirý beketteriniń eldi-mekenderden jyraqta ornalasýy, qutqarýshylardyń oqiǵa ornyna jedel jetýine qolbailaý bolyp otyr.
Dalanews.kz dereginshe shetelderde órt bolǵan aýmaqqa jetý ýaqyty qalalyq jerlerde 8-9 minýtty quraidy, al Qazaqstanda buǵan shamamen 11-12 minýt jumsalady eken, al aýdan-aýyldarǵa jetýge 30-40 minýt ýaqyt ketedi.
Órt sóndirýshiler men qutqarýshylardyń oqiǵa oryn alǵan jerge jedel jetý ýaqytyn qysqartýdy Tótenshe jaǵdai vitse-ministri Ibragim Kúlshimbaev baqylaýǵa alǵan.
"Elimizde órt sóndirý qyzmetiniń beketterin kóbeite túsý qajet. Ázir memlekettik biýdjet esebinen 20-ǵa tarta órt sóndirý beketiniń qurylysy júrgizilýde", – degen edi budan buryn Kúlshimbaev.
Resmi derekke súiensek elimizdegi órt sóndirý beketterine jylyna 40 myńǵa tartý qońyraý túsedi. Tótenshe jaǵdai ministrligine qarasty 400-den asa órt sóndirý bólimshesi bar. Degenmen, oqiǵa oryn alǵan aimaqqa der ýaqytynda jetý úshin bulardyń sany azdyq etetin ministrlik te moiyndap otyr.
Kúlshimbaevtiń málimetinshe otandyq órt sóndirý qyzmetine shamamen 120 órt sóndirý deposy qajet.
...
Vedomstvo óz tarapynan órt sóndirýshilerdi udaiy qoldaýdy júzege asyryp keledi. Olardyń eńbegin eskerip, qurmet kórsetý úrdisi dástúrge ainalǵan.
Esterińizde bolsa, shilde aiynda Qaraǵandy oblysynyń Ulytaý aýdanynda órt shyǵyp, mamandar tilsiz jaýmen tórt kúni boiy alysqan edi. Aýmaǵy 6 myń gektar jerdi qamtyǵan qyzyl jalyndy órt sóndirýshiler irgedegi eldi-mekenderge jetkizbei aýyzdaqtaǵan bolatyn.
Kúni keshe ministr Ilin osy oqiǵanyń bel ortasynda bolǵan órt sóndirýshilerdi marapattap keýdelerine tósbelgi taqty. Birqataryna “Qurmet” gramotasyn tabys etti.
“Qaraǵandy oblysyndaǵy 6 birdei eldi-mekendi órt sharpýy múmkin edi. Alaida órt sóndirýshilerdiń janqiiarlyq eńbeginiń arqasynda tilsiz jaýdy tuzaqtadyq. Qutqarýshylar 6 myń ga jýyq dala órtin óshirdi. Qiyn shaqta kásibilik pen qyraǵylyq kórsete bilgen sizderge alǵys aitamyn", – dedi vedomstvo basshysy.
Aita keteiik jyl basynda ministr elimizde eriktilerden quralǵan órt sóndirý jasaqtary paida bolatynyn aitqan. Onyń pikirinshe tilsiz jaýdyń aldyn-alýda órt sóndirýshiler men qutqarýshylar ǵana qarap otyrýǵa bolmaidy.
Eriktilerden quralǵan órt sóndirý jasaqtaryna resmi mártebe berý máselesi qyrkúiek aiynda qaralýy tiis.
