بۇعان دەيىن باسپا ءسوز وكىلدەرىمەن تىلدەسكەن توتەنشە جاعداي ءمينيسترى يۋريي يلين ءتىلسىز جاۋدىڭ الدىن-الۋداعى ءورت سوندىرۋشىلەردىڭ جانقيارلىق ەڭبەگىن ەرەكشە اتاپ ءوتىپ، وسى سالاداعى تۇيتكىلدى ماسەلەلەرگە دە توقتالعان ەدى.
ءمينيستردىڭ اتاپ وتكەنىندەي بيىل قىزىل جالىنمەن ارپالىسقان ءورت سوندىرۋشىلەردىڭ جەدەل قيمىلىنىڭ ناتيجەسىندە ەلىمىزدەگى ءورتتىڭ كورسەتكىشى بىلتىرعى جىلعى سايكەس كەزەڭمەن سالىستىرعاندا 7-8 پايىزعا تومەندەگەن.
ايتسە دە، بۇل ءورتتىڭ الدىن-الۋداعى احۋالدىڭ تۇزەلگەنىن بىلدىرمەيدى. ۆەدومستۆا باسشىسىنىڭ مالىمەتىنشە، ءورت ءسوندىرۋ بەكەتتەرىنىڭ ەلدى-مەكەندەردەن جىراقتا ورنالاسۋى، قۇتقارۋشىلاردىڭ وقيعا ورنىنا جەدەل جەتۋىنە قولبايلاۋ بولىپ وتىر.
Dalanews.kz دەرەگىنشە شەتەلدەردە ءورت بولعان اۋماققا جەتۋ ۋاقىتى قالالىق جەرلەردە 8-9 مينۋتتى قۇرايدى، ال قازاقستاندا بۇعان شامامەن 11-12 مينۋت جۇمسالادى ەكەن، ال اۋدان-اۋىلدارعا جەتۋگە 30-40 مينۋت ۋاقىت كەتەدى.
ءورت سوندىرۋشىلەر مەن قۇتقارۋشىلاردىڭ وقيعا ورىن العان جەرگە جەدەل جەتۋ ۋاقىتىن قىسقارتۋدى توتەنشە جاعداي ۆيسە-مينيسترى يبراگيم كۇلشىمبايەۆ باقىلاۋعا العان.
"ەلىمىزدە ءورت ءسوندىرۋ قىزمەتىنىڭ بەكەتتەرىن كوبەيتە ءتۇسۋ قاجەت. ءازىر مەملەكەتتىك بيۋدجەت ەسەبىنەن 20-عا تارتا ءورت ءسوندىرۋ بەكەتىنىڭ قۇرىلىسى جۇرگىزىلۋدە"، – دەگەن ەدى بۇدان بۇرىن كۇلشىمبايەۆ.
رەسمي دەرەككە سۇيەنسەك ەلىمىزدەگى ءورت ءسوندىرۋ بەكەتتەرىنە جىلىنا 40 مىڭعا تارتۋ قوڭىراۋ تۇسەدى. توتەنشە جاعداي مينيسترلىگىنە قاراستى 400-دەن اسا ءورت ءسوندىرۋ بولىمشەسى بار. دەگەنمەن، وقيعا ورىن العان ايماققا دەر ۋاقىتىندا جەتۋ ءۇشىن بۇلاردىڭ سانى ازدىق ەتەتىن مينيسترلىك تە مويىنداپ وتىر.
كۇلشىمبايەۆتىڭ مالىمەتىنشە وتاندىق ءورت ءسوندىرۋ قىزمەتىنە شامامەن 120 ءورت ءسوندىرۋ دەپوسى قاجەت.
...
ۆەدومستۆو ءوز تاراپىنان ءورت سوندىرۋشىلەردى ۇدايى قولداۋدى جۇزەگە اسىرىپ كەلەدى. ولاردىڭ ەڭبەگىن ەسكەرىپ، قۇرمەت كورسەتۋ ءۇردىسى داستۇرگە اينالعان.
ەستەرىڭىزدە بولسا، شىلدە ايىندا قاراعاندى وبلىسىنىڭ ۇلىتاۋ اۋدانىندا ءورت شىعىپ، ماماندار ءتىلسىز جاۋمەن ءتورت كۇنى بويى الىسقان ەدى. اۋماعى 6 مىڭ گەكتار جەردى قامتىعان قىزىل جالىندى ءورت سوندىرۋشىلەر ىرگەدەگى ەلدى-مەكەندەرگە جەتكىزبەي اۋىزداقتاعان بولاتىن.
كۇنى كەشە مينيستر يلين وسى وقيعانىڭ بەل ورتاسىندا بولعان ءورت سوندىرۋشىلەردى ماراپاتتاپ كەۋدەلەرىنە توسبەلگى تاقتى. ءبىرقاتارىنا “قۇرمەت” گراموتاسىن تابىس ەتتى.
“قاراعاندى وبلىسىنداعى 6 بىردەي ەلدى-مەكەندى ءورت شارپۋى مۇمكىن ەدى. الايدا ءورت سوندىرۋشىلەردىڭ جانقيارلىق ەڭبەگىنىڭ ارقاسىندا ءتىلسىز جاۋدى تۇزاقتادىق. قۇتقارۋشىلار 6 مىڭ گا جۋىق دالا ءورتىن ءوشىردى. قيىن شاقتا كاسىبيلىك پەن قىراعىلىق كورسەتە بىلگەن سىزدەرگە العىس ايتامىن"، – دەدى ۆەدومستۆو باسشىسى.
ايتا كەتەيىك جىل باسىندا مينيستر ەلىمىزدە ەرىكتىلەردەن قۇرالعان ءورت ءسوندىرۋ جاساقتارى پايدا بولاتىنىن ايتقان. ونىڭ پىكىرىنشە ءتىلسىز جاۋدىڭ الدىن-الۋدا ءورت سوندىرۋشىلەر مەن قۇتقارۋشىلار عانا قاراپ وتىرۋعا بولمايدى.
ەرىكتىلەردەن قۇرالعان ءورت ءسوندىرۋ جاساقتارىنا رەسمي مارتەبە بەرۋ ماسەلەسى قىركۇيەك ايىندا قارالۋى ءتيىس.
