Qaraǵandy oblysynda ózin órt qaýipsizdigi qyzmetiniń mamany retinde tanystyryp, kásipkerlerdi aldaǵan 37 jastaǵy er adam ustaldy, dep habarlaidy dalanews.kz.
Tergeý málimetinshe, kúdikti kásipkerlerge habarlasyp, ózin Tótenshe jaǵdailar ministrliginiń órt qaýipsizdigi qyzmetkeri retinde tanystyrǵan. Ol kásipkerlik nysandaryndaǵy órtke qarsy dabyl júielerin shuǵyl jańartý qajet ekenin aityp, talap oryndalmaǵan jaǵdaida iri kólemde aiyppul salynatynyn eskertken.
Sondai-aq, kúdikti órtke qarsy dabyl qondyrǵylaryn naryqtaǵy baǵadan áldeqaida arzan jetkizip bere alatyn adamdardy tanitynyn aityp, tapsyrysty ózi uiymdastyrýdy usynǵan. Keiin jábirlenýshilerdiń aqshasyn óziniń jaqyn týysy men tanysynyń bank shottaryna aýdartqan.
Maýsymda osyndai shemaǵa aldanǵan jergilikti kásipker politsiiaǵa júgingen. Saldarynan oǵan shamamen 200 myń teńge kóleminde materialdyq shyǵyn kelgen.
IIM málimetinshe, jedel izdestirý is-sharalary barysynda kúdikti anyqtalyp, ustaldy. Qazir bul derek boiynsha tergeý júrgizilip jatyr.
