Petropavl qalasynda úsh balanyń anasy 2007 jyldan beri kezekte turǵan memlekettik turǵyn úiden qaǵylǵan. Ákimdik ókilderiniń pikirinshe, jalǵyzbasty anaǵa 10,5 sharshy metrlik turǵyn alań "jetkilikti" bolǵan. Bul týraly Joǵarǵy sottyń baspasóz qyzmeti málimdedi, dep habarlaidy Dalanews.kz.
Áiel adam memlekettik qyzmetker retinde turǵyn úi kezegine tirkelgen. Ol buǵan deiin ata-anasynan Olshanka aýylyndaǵy úidiń tórtten bir bóligin muraǵa alǵan. 2023 jyly bul úlesin kórshisine syiǵa tartyp bergen. Alaida ákimdik bul múlikti tolyqqandy turǵyn úi retinde esepke alyp, ony baǵdarlamaǵa qatysý quqyǵynan aiyrmaq bolǵan.
"2024 jyly áielge Petropavl qalasynan jergilikti atqarýshy organ arqyly beriletin turǵyn úi baǵdarlamasy boiynsha páter bólindi. Alaida qalalyq turǵyn úi-kommýnaldyq sharýashylyq bólimi áielmen satyp alý-satý kelisimshartyn jasaýdan bas tartty. Sebep retinde burynǵy turǵyn úidiń adam turmysyna jaramdy ekenin alǵa tartqan", – delingen Joǵarǵy sottyń habarlamasynda.
Sot bul sheshimmen kelispedi. Áiel ielik etken turǵyn úidegi úlestiń jalpy aýdany 20 sharshy metrden sál ǵana asqan, al naqty turǵyn alańy – nebári 10,5 sharshy metr. Bul sanitarlyq jáne gigienalyq talaptarǵa sáikes kelmeidi. "Turǵyn úi qatynastary týraly" zań boiynsha, ár adamǵa keminde 15 sharshy metr bólinýi tiis. Onyń ústine, ananyń uldary da, qyzdary da bar. Iaǵni, jeke bólme qajet.
Sot ana men balalardyń jaǵdaiyn eskerip, talap-aryzdy qanaǵattandyrdy jáne turǵyn úi-kommýnaldyq bólimin satyp alý-satý kelisimin jasaýǵa mindettedi. Sheshim zańdy kúshine endi.
