پەتروپاۆل قالاسىندا ءۇش بالانىڭ اناسى 2007 جىلدان بەرى كەزەكتە تۇرعان مەملەكەتتىك تۇرعىن ۇيدەن قاعىلعان. اكىمدىك وكىلدەرىنىڭ پىكىرىنشە، جالعىزباستى اناعا 10،5 شارشى مەترلىك تۇرعىن الاڭ "جەتكىلىكتى" بولعان. بۇل تۋرالى جوعارعى سوتتىڭ باسپا ءسوز قىزمەتى مالىمدەدى، دەپ حابارلايدى Dalanews.kz.

ايەل ادام مەملەكەتتىك قىزمەتكەر رەتىندە تۇرعىن ءۇي كەزەگىنە تىركەلگەن. ول بۇعان دەيىن اتا-اناسىنان ولشانكا اۋىلىنداعى ءۇيدىڭ تورتتەن ءبىر بولىگىن مۇراعا العان. 2023 جىلى بۇل ۇلەسىن كورشىسىنە سىيعا تارتىپ بەرگەن. الايدا اكىمدىك بۇل مۇلىكتى تولىققاندى تۇرعىن ءۇي رەتىندە ەسەپكە الىپ، ونى باعدارلاماعا قاتىسۋ قۇقىعىنان ايىرماق بولعان.

"2024 جىلى ايەلگە پەتروپاۆل قالاسىنان جەرگىلىكتى اتقارۋشى ورگان ارقىلى بەرىلەتىن تۇرعىن ءۇي باعدارلاماسى بويىنشا پاتەر ءبولىندى. الايدا قالالىق تۇرعىن ۇي-كوممۋنالدىق شارۋاشىلىق ءبولىمى ايەلمەن ساتىپ الۋ-ساتۋ كەلىسىمشارتىن جاساۋدان باس تارتتى. سەبەپ رەتىندە بۇرىنعى تۇرعىن ءۇيدىڭ ادام تۇرمىسىنا جارامدى ەكەنىن العا تارتقان"، – دەلىنگەن جوعارعى سوتتىڭ حابارلاماسىندا.

سوت بۇل شەشىممەن كەلىسپەدى. ايەل يەلىك ەتكەن تۇرعىن ۇيدەگى ۇلەستىڭ جالپى اۋدانى 20 شارشى مەتردەن ءسال عانا اسقان، ال ناقتى تۇرعىن الاڭى – نەبارى 10،5 شارشى مەتر. بۇل سانيتارلىق جانە گيگيەنالىق تالاپتارعا سايكەس كەلمەيدى. "تۇرعىن ءۇي قاتىناستارى تۋرالى" زاڭ بويىنشا، ءار ادامعا كەمىندە 15 شارشى مەتر ءبولىنۋى ءتيىس. ونىڭ ۇستىنە، انانىڭ ۇلدارى دا، قىزدارى دا بار. ياعني، جەكە بولمە قاجەت.

سوت انا مەن بالالاردىڭ جاعدايىن ەسكەرىپ، تالاپ-ارىزدى قاناعاتتاندىردى جانە تۇرعىن ۇي-كوممۋنالدىق ءبولىمىن ساتىپ الۋ-ساتۋ كەلىسىمىن جاساۋعا مىندەتتەدى. شەشىم زاڭدى كۇشىنە ەندى.