Qyzylorda qalasynda biylǵy Ulttyq biryńǵai testileýdiń (UBT) alǵashqy kúni kútpegen oqiǵamen bastaldy. Testileý ortalyǵynda jaryq birneshe márte óship, 160-qa jýyq túlek qiyn jaǵdaiǵa tap boldy, – dep habarlaidy Dalanews.kz Informbiýro baǵdarlamasyna silteme jasap.
Ata-analar men oqýshylar bul jaǵdaiǵa alańdaýly: olar jaryqtyń qaita-qaita sónýi nátijege keri áser etti dep esepteidi.
Túlekterdiń biri - Danara Omarova júie kórsetken nátijeni kórip, óz kózine ózi senbegen.
"Basynda sanap otyrdym, dúnie júzi tarihynan 39 ball shyqty. Oǵan naqty senimdimin. Al aiaqtaǵan soń qarasam, 24 ball bolyp tur. Shynymdy aitsam, jaryqtyń óshkeni qatty áser etti", – deidi mektep túlegi.
Ata-analar da bul jaǵdaiǵa bei-jai qaramady. Olardyń aitýynsha, testileý kezinde búkil qalada jaryq bolǵanymen, tek test ortalyǵynda ǵana jaryq sónip otyrǵan.
"Balalar jylap jatqasyn ata-analar jan-jaqqa taraýǵa májbúr boldy. Al ministrlik jaryq 5-9 minýtqa ǵana sóndi deidi. Bul shyndyqqa janaspaidy. Balalar 25-30 minýtqa deiin jaryq bolmaǵanyn aityp otyr", – deidi Qyzylorda qalasynyń turǵyny Gúlmeiram Nurmaǵambetova.
Ulttyq testileý ortalyǵynyń bas sarapshysy Aqbota Baiqońyrova túlekterge tolyq 240 minýt berilgenin, jaryq eki ret – 9 jáne 5 minýtqa ǵana sóngenin habarlady. Ortalyq ókilderi júiede saqtalǵan derekterge sáikes ball ádil esepteldi dep otyr. Olar bir sónip, bir qosylǵan kompiýterler baldy tómendetip kórsetti degen kúmándi joqqa shyǵardy.
Alaida ata-analar men oqýshylar bul jaýappen kelispeidi. Olar jaryqtyń qaita-qaita óshýi balalardyń zeiini men psihologiialyq ahýalyna keri áser etkenin aityp, synaqty qaita tapsyrý múmkindigin qarastyrýdy talap etip otyr.
Bul oqiǵa qoǵamnyń qyzý talqysyna tústi.
