Atyraý oblysynda bir otbasynyń tórt múshesin óltirdi dep aiyptalǵan Sultan Sársemálievke qatysty sotta taraptardyń jaryssózi bastaldy. Memlekettik aiyptaýshy sottan ony kináli dep tanyp, ómir boiyna bas bostandyǵynan aiyrýdy surady, dep habarlaidy dalanews.kz.
Rezonans týdyrǵan qylmystyq is Atyraý oblysynyń qylmystyq ister jónindegi mamandandyrylǵan aýdanaralyq sotynda qaralyp jatyr. Sársemáliev burynǵy jubaiy Aqbaian Muqanǵalievanyń ákesi men anasyn, aǵasy men qaryndasyn óltirdi dep aiyptalýda. Qaiǵyly oqiǵa 2025 jyldyń sońynda Jangeldin aýylynda bolǵan.
Sot jaryssózi barysynda prokýror aiyptalýshyny Qylmystyq kodekstiń birneshe baby boiynsha kináli dep tanyp, jazasyn tótenshe qaýipsizdik mekemesinde óteýdi usyndy.
"Qylmystyq kodekstiń 58-babynyń 4-bóligi negizinde Sársemáliev Sultan Samigollaulyna túpkilikti jaza retinde ómir boiyna bas bostandyǵynan aiyrý jazasyn taǵaiyndaýdy suraimyn", – dedi memlekettik aiyptaýshy.
Sársemálievke eki nemese odan da kóp adamdy óltirý, dármensiz kúidegi adamdy óltirý, asa qatygezdikpen jáne paidakúnemdik maqsatpen kisi óltirý, sondai-aq qaraqshylyqpen nemese qorqytyp alýmen ushtasqan qylmys jasaý aiyptary taǵylǵan.
Buǵan qosa, ol iri kólemde urlyq pen alaiaqtyq jasaý, mal urlaý jáne qujattardy zańsyz ielený, jasyrý, joiý nemese búldirý baptary boiynsha da jaýapqa tartylyp jatyr.
Prokýror sottan aiyptalýshydan jábirlenýshilerge ótemaqy qoryna 30 ailyq eseptik kórsetkish, iaǵni 129 750 teńge óndirýdi surady. Sondai-aq 2 512 128 teńge kólemindegi protsestik shyǵyndy ótetip, qamaýda ustaý túrindegi bultartpaý sharasyn ózgerissiz qaldyrýdy usyndy.
Memlekettik aiyptaýshy jábirlenýshi taraptyń materialdyq jáne moraldyq zalaldy óteý týraly azamattyq talaptaryn da qanaǵattandyrýdy surady.
Al Sultan Sársemáliev Naýryz Muqanǵalievti qasaqana óltirdi degen aiypty moiyndamaitynyn málimdegen.
Taraptardyń jaryssózi aiaqtalǵannan keiin sottalýshyǵa sońǵy sóz beriledi. Budan soń sot úkim shyǵarý úshin keńesý bólmesine ketedi.
