Memleket basshysy Qarjy naryǵyn retteý jáne damytý agenttiginiń tóraǵasy Mádina Ábilqasymovany qabyldady, - dep habarlaidy Dalanews.kz.
Mádina Ábilqasymova qarjy naryǵyn damytý salasynyń byltyrǵy qorytyndylary týraly esep berdi; bank sektorynda turaqtylyq saqtalyp turǵany jóninde baiandady:
– 2024 jyldyń basynan beri bankterdiń aktivteri 19,7 paiyzǵa, iaǵni 61,6 trillion teńgege deiin ósken;
– ekonomikany kreditteý 20,9 paiyzǵa nemese 33,8 trillion teńgege deiin ulǵaiǵan;
– bankterdiń jumys istemeitin aktivteri – 3,1 paiyzdan tómen deńgeide;
– agenttik 21 bankke jyl saiynǵy qadaǵalaý-baǵalaý jumystaryn aiaqtaǵan.
Sondai-aq 11 banktiń aktivi sapalyq turǵydan baǵalanyp, stress-testileý júrgizilgen. Atalǵan shara bank júiesi aktivteriniń 85 paiyzyn qamtyǵan. Buǵan qosa, 400 milliard teńge kóleminde memlekettiń qoldaý qarajaty merziminen buryn qaitarylǵan.
Mádina Ábilqasymova strestik aktivter naryǵyn damytýdy kózdeitin zańnamalyq túzetýler qabyldanyp, osy tektes aktivterdi satýǵa arnalǵan alǵashqy tsifrlyq platforma iske qosylǵanyn aitty. Básekelestikti kúsheitý úshin bank sektoryna Ońtústik Koreiadan, Qatar Memleketinen jáne Birikken Arab Ámirlikterinen sheteldik bankter tartylǵan.
Ol naqty sektor men biznes sýbektilerin nesieleý týraly málimet berdi:
– 2024 jyly bizneske berilgen kreditter 16,3 paiyzǵa nemese 13,1 trillion teńgege deiin ulǵaiǵan. Bul rette bizneske 18,2 trillion teńge somasyna jańa zaimdar berilgen;
– Prezidenttiń halyqtyń shamadan tys kredit alýyn tómendetý jóninde bergen tapsyrmasyna sáikes, 2024 jylǵy maýsymda kredit berý kezinde táýekelderdi barynsha azaitý jáne qaryz alýshylardyń quqyqtaryn qorǵaý baǵytynda zań qabyldanǵan;
– 614 myń azamattyń 210 milliard teńge somasyndaǵy problemalyq bereshegi qaita qurylymdalyp, ishinara nemese tolyq keshirilgen.
Mádina Ábilqasymova azamattardy qarjylyq alaiaqtyqtan qorǵaý maqsatynda zańnamalyq túzetýlerdiń jańa toptamasy ázirlengenin jetkizdi; osylaisha saqtandyrý naryǵyn tsifrlandyrý nátijesin tanystyrdy:
– azamattardyń turǵyn úilerin apat táýekelderinen mindetti saqtandyrý modeli ázirlengen;
– kredittik reiting agenttikteri týraly, Investitsiialyq jáne venchýrlyq qorlar týraly zań jobalary daiyndalǵan.
Qasym-Jomart Toqaev agenttikke qarjylyq turaqtylyqty qamtamasyz etý, naqty sektordy kreditteý aiasyn odan ári keńeitý, qarjylyq qyzmetterde tutynýshylardyń quqyqtaryn qorǵaý tetikterin kúsheitý jóninde birqatar mindet júktedi.
Aita keteiik, Úkimettiń keńeitilgen otyrysynda Prezident Qasym-Jomart Toqaev bankterge qatysty tapsyrma berdi.
"2017 jyldan bastap 2020 jylǵa deiin birqatar iri bankke memleket tarapynan, sonyń ishinde Ulttyq qor esebinen 15 jyl merzimge qarjylai qoldaý kórsetilgenin bilesizder. Bul kómek bank aktsionerleri de ortaq jaýapkershilikke ie bolady degen talappen berildi. Keibir bankter óz shyǵyndaryn áldeqashan ótegen. Biraq memlekettiń ieligindegi qarjyny qaitarýǵa asyqpaidy. Tipti ony joǵary paiyzben táýekeli az memlekettik qarjy quraldaryna salyp, kepildi tabys taýyp otyr. Úkimet pen Ulttyq bankke shara qabyldaýdy tapsyramyn. Bir nárseni atap ótkim keledi: bankter Úkimettiń, sonyń ishinde halyqtyń jaýy emes. Biraq dialog negizindegi ádil seriktestik ornaýǵa tiis. Kezinde sizderge kómektestik, endi sizderdiń kezekterińiz keldi", - dedi Toqaev.
