مەملەكەت باسشىسى قارجى نارىعىن رەتتەۋ جانە دامىتۋ اگەنتتىگىنىڭ ءتوراعاسى ءمادينا ءابىلقاسىموۆانى قابىلدادى، - دەپ حابارلايدى Dalanews.kz.
ءمادينا ءابىلقاسىموۆا قارجى نارىعىن دامىتۋ سالاسىنىڭ بىلتىرعى قورىتىندىلارى تۋرالى ەسەپ بەردى؛ بانك سەكتورىندا تۇراقتىلىق ساقتالىپ تۇرعانى جونىندە باياندادى:
– 2024 جىلدىڭ باسىنان بەرى بانكتەردىڭ اكتيۆتەرى 19،7 پايىزعا، ياعني 61،6 تريلليون تەڭگەگە دەيىن وسكەن؛
– ەكونوميكانى كرەديتتەۋ 20،9 پايىزعا نەمەسە 33،8 تريلليون تەڭگەگە دەيىن ۇلعايعان؛
– بانكتەردىڭ جۇمىس ىستەمەيتىن اكتيۆتەرى – 3،1 پايىزدان تومەن دەڭگەيدە؛
– اگەنتتىك 21 بانككە جىل سايىنعى قاداعالاۋ-باعالاۋ جۇمىستارىن اياقتاعان.
سونداي-اق 11 بانكتىڭ اكتيۆى ساپالىق تۇرعىدان باعالانىپ، سترەسس-تەستىلەۋ جۇرگىزىلگەن. اتالعان شارا بانك جۇيەسى اكتيۆتەرىنىڭ 85 پايىزىن قامتىعان. بۇعان قوسا، 400 ميلليارد تەڭگە كولەمىندە مەملەكەتتىڭ قولداۋ قاراجاتى مەرزىمىنەن بۇرىن قايتارىلعان.
ءمادينا ءابىلقاسىموۆا سترەستىك اكتيۆتەر نارىعىن دامىتۋدى كوزدەيتىن زاڭنامالىق تۇزەتۋلەر قابىلدانىپ، وسى تەكتەس اكتيۆتەردى ساتۋعا ارنالعان العاشقى سيفرلىق پلاتفورما ىسكە قوسىلعانىن ايتتى. باسەكەلەستىكتى كۇشەيتۋ ءۇشىن بانك سەكتورىنا وڭتۇستىك كورەيادان، قاتار مەملەكەتىنەن جانە بىرىككەن اراب امىرلىكتەرىنەن شەتەلدىك بانكتەر تارتىلعان.
ول ناقتى سەكتور مەن بيزنەس سۋبەكتىلەرىن نەسيەلەۋ تۋرالى مالىمەت بەردى:
– 2024 جىلى بيزنەسكە بەرىلگەن كرەديتتەر 16،3 پايىزعا نەمەسە 13،1 تريلليون تەڭگەگە دەيىن ۇلعايعان. بۇل رەتتە بيزنەسكە 18،2 تريلليون تەڭگە سوماسىنا جاڭا زايمدار بەرىلگەن؛
– پرەزيدەنتتىڭ حالىقتىڭ شامادان تىس كرەديت الۋىن تومەندەتۋ جونىندە بەرگەن تاپسىرماسىنا سايكەس، 2024 جىلعى ماۋسىمدا كرەديت بەرۋ كەزىندە تاۋەكەلدەردى بارىنشا ازايتۋ جانە قارىز الۋشىلاردىڭ قۇقىقتارىن قورعاۋ باعىتىندا زاڭ قابىلدانعان؛
– 614 مىڭ ازاماتتىڭ 210 ميلليارد تەڭگە سوماسىنداعى پروبلەمالىق بەرەشەگى قايتا قۇرىلىمدالىپ، ءىشىنارا نەمەسە تولىق كەشىرىلگەن.
ءمادينا ءابىلقاسىموۆا ازاماتتاردى قارجىلىق الاياقتىقتان قورعاۋ ماقساتىندا زاڭنامالىق تۇزەتۋلەردىڭ جاڭا توپتاماسى ازىرلەنگەنىن جەتكىزدى؛ وسىلايشا ساقتاندىرۋ نارىعىن سيفرلاندىرۋ ناتيجەسىن تانىستىردى:
– ازاماتتاردىڭ تۇرعىن ۇيلەرىن اپات تاۋەكەلدەرىنەن مىندەتتى ساقتاندىرۋ مودەلى ازىرلەنگەن؛
– كرەديتتىك رەيتينگ اگەنتتىكتەرى تۋرالى، ينۆەستيسيالىق جانە ۆەنچۋرلىق قورلار تۋرالى زاڭ جوبالارى دايىندالعان.
قاسىم-جومارت توقايەۆ اگەنتتىككە قارجىلىق تۇراقتىلىقتى قامتاماسىز ەتۋ، ناقتى سەكتوردى كرەديتتەۋ اياسىن ودان ءارى كەڭەيتۋ، قارجىلىق قىزمەتتەردە تۇتىنۋشىلاردىڭ قۇقىقتارىن قورعاۋ تەتىكتەرىن كۇشەيتۋ جونىندە ءبىرقاتار مىندەت جۇكتەدى.
ايتا كەتەيىك، ۇكىمەتتىڭ كەڭەيتىلگەن وتىرىسىندا پرەزيدەنت قاسىم-جومارت توقايەۆ بانكتەرگە قاتىستى تاپسىرما بەردى.
"2017 جىلدان باستاپ 2020 جىلعا دەيىن ءبىرقاتار ءىرى بانككە مەملەكەت تاراپىنان، سونىڭ ىشىندە ۇلتتىق قور ەسەبىنەن 15 جىل مەرزىمگە قارجىلاي قولداۋ كورسەتىلگەنىن بىلەسىزدەر. بۇل كومەك بانك اكسيونەرلەرى دە ورتاق جاۋاپكەرشىلىككە يە بولادى دەگەن تالاپپەن بەرىلدى. كەيبىر بانكتەر ءوز شىعىندارىن الدەقاشان وتەگەن. ءبىراق مەملەكەتتىڭ يەلىگىندەگى قارجىنى قايتارۋعا اسىقپايدى. ءتىپتى ونى جوعارى پايىزبەن تاۋەكەلى از مەملەكەتتىك قارجى قۇرالدارىنا سالىپ، كەپىلدى تابىس تاۋىپ وتىر. ۇكىمەت پەن ۇلتتىق بانككە شارا قابىلداۋدى تاپسىرامىن. ءبىر نارسەنى اتاپ وتكىم كەلەدى: بانكتەر ۇكىمەتتىڭ، سونىڭ ىشىندە حالىقتىڭ جاۋى ەمەس. ءبىراق ديالوگ نەگىزىندەگى ءادىل سەرىكتەستىك ورناۋعا ءتيىس. كەزىندە سىزدەرگە كومەكتەستىك، ەندى سىزدەردىڭ كەزەكتەرىڭىز كەلدى"، - دەدى توقايەۆ.
