Qasym-Jomart Toqaev shahardy órkendetýge qatysty oi-pikirin aita kele, birneshe baǵytta atqarylýǵa tiis jumystarǵa nazar aýdardy.
Memleket basshysynyń aitýynsha, eń aldymen, qala ekonomikasyn ártaraptandyrý arqyly onyń turaqty damýyn qamtamasyz etý qajet.
Almaty – elimizdiń ekonomikalyq damýynyń qozǵaýshy kúshi jáne kóshbasshysy.
Jalpy ishki ónimniń besten bir bóligi, biýdjet kirisiniń 25 paiyzdan astamy jáne Qazaqstannyń saýda operatsiialarynyń úshten bir bóligi osy qalaǵa tiesili.
Jyl basynan beri qala ekonomikasyna 930 milliard jeke investitsiia tartylǵan. Kásipkerlik dáiekti damyp keledi.
Shaǵyn jáne orta biznes sýbektileriniń sany 30 paiyzǵa ósken.
– Ekonomikanyń ártaraptandyrylý deńgeiiniń tómen bolýy qala turǵyndary tabysynyń ósimin baiaýlatady. Qala «ortasha tabys tuzaǵyna» tústi, odan shyǵý úshin qala ekonomikasyn túbegeili ártaraptandyrý qajet. Óńdeý ónerkásibin, týrizmdi, IT sektoryn jáne kreativti indýstriiany damytýǵa basa nazar aýdarý kerek. Básekelestikti yntalandyrý, investitsiia tartý jáne eńbek ónimdiligin aitarlyqtai arttyrý qajet.
Qala jaǵdaiyndaǵy óńdeý ónerkásibin damytý isi ekologiialyq taza jáne yqshamdy zamanaýi tehnologiialardy qoldana otyryp, úderisterdi joǵary deńgeide avtomattandyrýmen jáne tsifrlandyrýmen qatar júzege asyrylýy kerek.
Almatynyń indýstriialyq aimaǵy men «Alataý» innovatsiialyq tehnologiialar parkiniń áleýetin tolyq paidalaný qajet, – dedi Prezident.
Memleket basshysy óńirdiń erekshelikterin eskere otyryp, Almaty qalasy men Almaty oblysynyń ákimderine Almaty aglomeratsiiasynyń aiasynda óńdeý ónerkásibin birlesip damytýdy tapsyrdy.
Sondai-aq osy maqsatta jyl aiaǵyna deiin eki aimaqtyń tyǵyz yntymaqtastyǵyna negiz bolatyn «Aglomeratsiialardy damytý týraly» jańa Zań qabyldanatynyn aitty.
Qasym-Jomart Toqaev elimizdegi IT kompaniialardyń 40 paiyzdan astamy Almatyda ornalasqanyna toqtalyp, azamattardyń mańyzdy bastamalaryn júzege asyrý úshin jaqyn arada qalada habtar men klasterler iske qosylatynyn jetkizdi.
Sondai-aq bastapqy qarjylandyrylý somasy 10 milliard teńge bolatyn qalalyq venchýrlyq qor qurý jónindegi jergilikti biliktiń ideiasyn qoldaitynyn atap ótip, bul jobaǵa jeke kásipkerlerden qarjy tartýdyń mańyzdy ekenin aitty.
