Qazaqstan Prezidenti Qasym-Jomart Toqaevtyń atyna jańa Konstitýtsiia jobasy boiynsha ótken respýblikalyq referendýmǵa bailanysty shet memleketterdiń basshylary men halyqaralyq uiym jetekshilerinen quttyqtaý jedelhattary kelip túsýde, dep habarlaidy Dala News.
Aqordanyń málimetinshe, Resei Prezidenti Vladimir Pýtin Qazaqstandaǵy konstitýtsiialyq ózgerister eki el arasyndaǵy odaqtastyq qatynastar men jan-jaqty strategiialyq seriktestikti odan ári nyǵaita túsetinin atap ótken. Onyń aitýynsha, jalpyhalyqtyq daýys berý nátijesi Toqaevtyń memlekettik institýttardy kúsheitý jáne eldiń turaqty áleýmettik-ekonomikalyq damýyn qamtamasyz etý baǵytyndaǵy bastamalaryna keń qoldaý bar ekenin kórsetedi.
Ózbekstan Prezidenti Shavkat Mirziioev Qazaqstandaǵy saiasi jáne áleýmettik-ekonomikalyq jańǵyrý Jańa Qazaqstannyń turaqty damýyna yqpal etip, halyqaralyq bedelin arttyratynyna senim bildirgen. Onyń aitýynsha, referendýmǵa azamattardyń belsendi qatysýy júrgizilip jatqan reformalardyń halyq tarapynan qoldaý tapqanyn aiqyn kórsetedi.
Qyrǵyzstan Prezidenti Sadyr Japarov Toqaevty referendýmnyń tabysty ótýimen quttyqtap, bul tarihi qadam Qazaqstannyń odan ári órkendeýine jáne halyqtyń ál-aýqatyn arttyrýǵa yqpal etetinin atap ótken. Sonymen qatar ol Qazaqstannyń halyqaralyq arenadaǵy bedeli turaqty túrde nyǵaiyp kele jatqanyn jetkizgen.
Ázerbaijan Prezidenti Ilham Áliev jańa Konstitýtsiianyń qabyldanýyn Qazaqstan tarihyndaǵy jańa kezeńniń bastaýy dep baǵalap, bul qujat saiasi júieni jańǵyrtyp, eldiń qarqyndy damýyna jáne halyqaralyq róliniń artýyna yqpal etetinin málimdegen.
Belarýs Prezidenti Aleksandr Lýkashenko Konstitýtsiiadaǵy qaǵidattardyń iske asýy Qazaqstannyń gúldenýine negiz bolatynyn aityp, referendým nátijesi Toqaev júrgizip otyrǵan jańǵyrý baǵytyna azamattardyń senimi joǵary ekenin dáleldegenin atap ótken.
Serbiia Prezidenti Aleksandr Výchich Toqaevtyń reformalary men bastamalary eldiń damýyna baǵyttalǵan mańyzdy qadam ekenin aityp, Qazaqstannyń órshil maqsattarǵa umtylýyn joǵary baǵalaǵan.
Armeniia Premer-ministri Nikol Pashinian jalpyhalyqtyq daýys berý nátijesi qazaqstandyqtardyń el táýelsizdigin saqtaýǵa jáne zań ústemdigi ornaǵan qoǵam qurýǵa jaýapkershilikpen qaraitynyn kórsetetinin jetkizgen.
Sonymen qatar Qazaqstan Prezidentin Shanhai yntymaqtastyq uiymynyń bas hatshysy Nurlan Ermekbaev, TMD bas hatshysy Sergei Lebedev, Túrki memleketteri uiymynyń bas hatshysy Kýbanychbek Ómiráliev, UQShU bas hatshysy Taalatbek Masadykov, Ekonomikalyq yntymaqtastyq uiymynyń bas hatshysy Asad Madjid Han, sondai-aq Joǵary Eýraziialyq ekonomikalyq keńes tóraǵasy Baqytjan Saǵyntaev jáne basqa da halyqaralyq uiym jetekshileri quttyqtaǵan.
Aqordanyń habarlaýynsha, Memleket basshysynyń atyna quttyqtaý jedelhattary áli de kelip túsip jatyr.
