Memleket basshysy Qasym-Jomart Toqaev zańnyń qazaqstandyqtardyń ómirindegi róli týraly aitty, dep habarlaidy Dalanews.kz.
Prezident Zań – qysym kórsetýge nemese qýdalaýǵa arnalǵan qural emes ekenin atap ótti.
"Zań – ár adamnyń quqyǵy men bostandyǵynyń qorǵany. Biz osy aqiqatty tereń túsinetin azamattyq jáne mádeni orta qalyptastyrýymyz qajet. Tártip – jalpyǵa ortaq qundylyqqa, al zańǵa baǵyný – árkimniń ómir saltyna ainalýǵa tiis. Memlekettik apparat pen búkil qoǵam jumylyp jumys istese, elimiz kózdegen maqsatyna jetedi. Ozyq oily ult bolý úshin ádeptilik, ózara qurmet, ustamdylyq, sypaiylyq siiaqty qasietterdi barynsha dáriptegen jón. Azamattarymyz ádep pen zańdy májbúrlikpen emes, sanaly túrde saqtaýy kerek.Zań men tártip basty qundylyqqa ainalsa, turmystyq zorlyq-zombylyq, vandalizm, esirtki saýdasy, lýdomaniia siiaqty qaterlerdiń tamyryna balta shabylady. Biz byltyr Ulttyq quryltaida osy áleýmettik keseldermen ymyrasyz kúres máselesin talqyladyq.
Óskeleń urpaqtyń boiyna jasampazdyq qasietterdi sińirip, olardy tártipke baýlý qajet. Bul – ata-analar men bilim berý júiesiniń ortaq mindeti. Balalar qoǵamdyq qundylyqtardyń mán-maǵynasyn ustazynan úirenedi. Olardyń minez-qulqy negizinen mektep qabyrǵasynda qalyptasady. Sondyqtan Úkimet bilim mekemelerindegi tárbie jumysyn qaita zerdelep qaraýy kerek. Jas urpaqty zańdy syilaýǵa úiretý máselesine basa mán bergen jón. Balalar mektepten «Adal azamat» bolyp shyǵýy qajet", - deidi Memleket basshysy.
