"Qurmetti otandastar! Sizderdi Qazaqstan Konstitýtsiiasy kúnimen quttyqtaimyn! Biyl bul meiram airyqsha saiasi mánge ie bolyp otyr. Ata zańǵa ózgerister engizý jónindegi jalpyulttyq referendýmnyń nátijesi halqymyzdyń birligin jáne elimizdi jan-jaqty jańǵyrtýǵa baǵyttalǵan aýqymdy reformalardyń barynsha qoldaý tapqanyn kórsetti.
Biz zań ústemdigi, ádildik jáne jalpyǵa birdei múmkindik qaǵidattaryn ustanyp, Jańa Qazaqstandy qurýǵa kiristik.
Elimizdiń árbir jaýapty azamatynyń reformalardy iske asyrýǵa belsene qatysyp, memleketimizdiń damýyna úles qosatyn kezi keldi.
Konstitýtsiiada belgilengen demokratiia qundylyqtary, azamattardyń quqyqtary men bostandyqtarynyń kepildikteri Qazaqstan Respýblikasy damýynyń naqty strategiialyq baǵdaryn aiqyndaidy.
Qolǵa alynyp jatqan ózgeristerdiń basty mindeti – halyqtyń ál-aýqatyn arttyrý, memlekettiligimizdi meilinshe nyǵaitý jáne qoǵamdy úilesimdi damytý. Bul mindetterdi oryndaýǵa elimizdiń árbir azamaty atsalysýy qajet, qadirli otandastar! Barshańyzǵa shyn júrekten zor densaýlyq, baq-bereke tileimin! Otanymyzdyń igiligi jolyndaǵy barlyq maqsatqa jete berińizder!" - dedi Memleket basshysy.
