Memleket basshysy Qasym-Jomart Toqaev Túrkistan oblysynyń ákimi Nuralhan Kósherovti qabyldap, óńirdiń áleýmettik-ekonomikalyq damýy men aldaǵy josparlary týraly esep tyńdady, dep habarlaidy Dala News.
Ákimniń aitýynsha, oblystyń ekonomikalyq ósimi 113,9 paiyzdy quraǵan. Sonymen qatar memlekettik biýdjetke túsetin salyq túsimderi 1 trillion teńgege artqan.
Nuralhan Kósherov 2025 jyly óńirge 1,7 trillion teńge investitsiia tartylǵanyn, onyń ishinde 1,4 trillion teńgesi jeke investitsiia ekenin aitty. Al tikelei sheteldik investitsiia kólemi 1,4 milliard dollarǵa jetken.
Sondai-aq ótken jyly jalpy quny 340 milliard teńgeni quraityn 58 investitsiialyq joba iske qosylyp, nátijesinde 8 myńnan astam jańa jumys orny ashylǵan.
Qazir oblysta 21 indýstrialdyq aimaq jumys isteidi. Al «Turan» arnaiy ekonomikalyq aimaǵynda quny 315 milliard teńgeni quraityn 26 joba júzege asyrylyp jatyr.
Aýyl sharýashylyǵy salasynda maqta-toqyma, júgeri jáne et óndirisi klasterleri damyp keledi. Jobalar tolyq iske qosylǵan jaǵdaida 2027 jylǵa qarai aýyl sharýashylyǵy ónimderiniń kólemi qosymsha 479,5 milliard teńgege artady dep josparlanǵan.
Ákimniń málimetinshe, sońǵy úsh jylda ataýly áleýmettik kómek alýshylar sany eki esege azaiǵan. Al 148 myń adam jumyspen qamtý sharalaryna tartylyp, óńirdegi jumyssyzdyq deńgeii 4,6 paiyzdy quraǵan.
Sonymen qatar bilim berý, densaýlyq saqtaý, mádeniet nysandaryn salý, jol infraqurylymyn damytý, gazdandyrý jáne eldi mekenderdi aýyz sýmen qamtamasyz etý baǵytynda atqarylǵan jumystar týraly baiandaldy.
Kezdesý qorytyndysynda Prezident investitsiia tartý, aýyl sharýashylyǵy men óndiristi damytý jumystaryn jalǵastyrýdy tapsyrdy. Sondai-aq halyqtyń turmys sapasyn arttyrý, jańa jumys oryndaryn ashý jáne infraqurylymdy damytý máselelerine erekshe nazar aýdarý qajet ekenin atap ótti.
