Qasym-Jomart Toqaev Donald Tramptyń Qazaqstannan importtalatyn taýarlarǵa baj salyǵyn salý týraly hatyna jaýap joldady, dep habarlaidy dalanews.kz.
Memleket basshysy Qazaqstan Amerika Qurama Shtattarynyń burynnan kele jatqan senimdi saýda ári investitsiialyq seriktesi retinde ádil, túsinikti jáne ózara tiimdi saýda bailanystaryn damytýǵa beiildiligin atap ótti.
Qazaqstan Prezidenti saýda máseleleri boiynsha ratsionaldy sheshim ázirleý maqsatynda elimizdiń konstrýktivti dialogty jalǵastyrýǵa daiyn ekenin jetkizdi.
Qasym-Jomart Toqaev saýda problemasyna qatysty ortaq mámilege qol jetkizýge bolatynyna senim bildirdi.
Eske sala keteiik, buǵan deiin AQSh prezidenti Donald Tramp shetelden keletin taýarlarǵa baj salyǵy engiziletinin málimdedi. Saýda jáne integratsiia ministrligi atalǵan ózgeriske bailanysty pikir bildirdi.
Ministrlik málimetinshe, 7 shildede AQSh prezidentinen 1 tamyzdan bastap jańa importtyq baj engiziletini týraly resmi habarlama túsken.
"Qazaqstannan AQSh-qa eksporttalatyn ónimder úshin jetkiziletin taýardyń barlyq kólemine 25 paiyz biryńǵai mólsherleme belgilengen. Alaida qazaqstandyq eksporttyń basym bóligi - munai, ýran, kúmis, ferroqorytpa, tantal jáne titan siiaqty negizgi shikizat pen strategiialyq taýarlar. Olar baj salyǵynsyz jetkizilýin jalǵastyra beredi. Qabyldanǵan sharalar Qazaqstan eksportynyń shamamen 95 paiyzyna áser etpeidi dep josparlanyp otyr", - dep jazylǵan habarlamada.
Sonymen qatar qazaqstandyq taýarlarǵa saýda rejimin saqtaý maqsatynda QR Úkimeti AQSh ákimshiligine ózara saýda sharttaryn jaqsartý jónindegi naqty sharalar men bastamalardy joldaǵan.
