قاسىم-جومارت توقايەۆ دونالد ترامپتىڭ قازاقستاننان يمپورتتالاتىن تاۋارلارعا باج سالىعىن سالۋ تۋرالى حاتىنا جاۋاپ جولدادى، دەپ حابارلايدى dalanews.kz.
مەملەكەت باسشىسى قازاقستان امەريكا قۇراما شتاتتارىنىڭ بۇرىننان كەلە جاتقان سەنىمدى ساۋدا ءارى ينۆەستيسيالىق سەرىكتەسى رەتىندە ءادىل، تۇسىنىكتى جانە ءوزارا ءتيىمدى ساۋدا بايلانىستارىن دامىتۋعا بەيىلدىلىگىن اتاپ ءوتتى.
قازاقستان پرەزيدەنتى ساۋدا ماسەلەلەرى بويىنشا راسيونالدى شەشىم ازىرلەۋ ماقساتىندا ەلىمىزدىڭ كونسترۋكتيۆتى ديالوگتى جالعاستىرۋعا دايىن ەكەنىن جەتكىزدى.
قاسىم-جومارت توقايەۆ ساۋدا پروبلەماسىنا قاتىستى ورتاق مامىلەگە قول جەتكىزۋگە بولاتىنىنا سەنىم ءبىلدىردى.
ەسكە سالا كەتەيىك، بۇعان دەيىن اقش پرەزيدەنتى دونالد ترامپ شەتەلدەن كەلەتىن تاۋارلارعا باج سالىعى ەنگىزىلەتىنىن مالىمدەدى. ساۋدا جانە ينتەگراسيا مينيسترلىگى اتالعان وزگەرىسكە بايلانىستى پىكىر ءبىلدىردى.
مينيسترلىك مالىمەتىنشە، 7 شىلدەدە اقش پرەزيدەنتىنەن 1 تامىزدان باستاپ جاڭا يمپورتتىق باج ەنگىزىلەتىنى تۋرالى رەسمي حابارلاما تۇسكەن.
"قازاقستاننان اقش-قا ەكسپورتتالاتىن ونىمدەر ءۇشىن جەتكىزىلەتىن تاۋاردىڭ بارلىق كولەمىنە 25 پايىز ءبىرىڭعاي مولشەرلەمە بەلگىلەنگەن. الايدا قازاقستاندىق ەكسپورتتىڭ باسىم بولىگى - مۇناي، ۋران، كۇمىس، فەرروقورىتپا، تانتال جانە تيتان سياقتى نەگىزگى شيكىزات پەن ستراتەگيالىق تاۋارلار. ولار باج سالىعىنسىز جەتكىزىلۋىن جالعاستىرا بەرەدى. قابىلدانعان شارالار قازاقستان ەكسپورتىنىڭ شامامەن 95 پايىزىنا اسەر ەتپەيدى دەپ جوسپارلانىپ وتىر"، - دەپ جازىلعان حابارلامادا.
سونىمەن قاتار قازاقستاندىق تاۋارلارعا ساۋدا رەجيمىن ساقتاۋ ماقساتىندا ق ر ۇكىمەتى اقش اكىمشىلىگىنە ءوزارا ساۋدا شارتتارىن جاقسارتۋ جونىندەگى ناقتى شارالار مەن باستامالاردى جولداعان.
