QR Prezidenti Qasym-Jomart Toqaev jastar forýmynda 2020 jyldyń qańtar aiynan bastap ýniversitet pen kolledj stýdentteri shákirtaqysynyń 25 protsentke ósetinin málimdedi, dep habarlaidy Dalanews.kz.
- 2020 jyldyń 1 qańtarynan bastap stýdentterdiń, magistranttardyń jáne doktoranttardyń shákirtaqysy 25% -ǵa artady. Jalpy shamamen 130 myń adamnyń stipendiiasy kóteriledi, - dedi ol.
Sondai-aq, Memleket basshysy kolledj stýdentterine de osyndai qoldaý kórsetiletinin basa aitty.
- Esterińizde bolsa, biyl qyrkúiek aiynan bastap jumysshy mamandyqtaǵy 122 myń stýdenttiń stipendiiasy 30 protsentke ulǵaitylǵan. Endi, meniń tapsyrmam boiynsha, úkimet 2020 jyldyń qańtar aiynan bastap orta arnaýly bilim beretin kolledj stýdentteri stipendiiasynyń da kólemin 25 protsentke ósiredi, - dedi Toqaev.
Demek, taǵy 100 myń jastyń shákirtaqysy ósedi.
"Bul sharalar bizdiń stýdentterge jaqsy qoldaý bolady dep senemin", - dep sózin túiindedi Prezident.
