Prezident Qasym-Jomart Toqaev Shyńǵys han ulttyq mýzeiine bardy,- dep habarlaidy Dalanews.kz.
Qazaqstan Prezidenti Mońǵoliiaǵa memlekettik sapary aiasynda Ulan-Batyr qalasyndaǵy Shyńǵys han ulttyq mýzeiin arnaiy baryp kórdi.
2019 jyly ashylǵan mýzei qorynda 10 myńnan asa biregei jádiger bar.
Ekspozitsiianyń negizgi bóligi uly qolbasshy ári jihanger Shyńǵys han tulǵasyna arnalǵan. Budan bólek kórmede Ǵun dáýirinen bastap XX ǵasyrǵa deiingi Mońǵol memleketiniń qalyptasý kezeńderin tolyq qamtityn artefaktiler qoiylǵan.
Mýzeidiń taǵy bir mańyzdy mindeti – Eýraziia halyqtarynyń kóshpeli órkenieti men mádeni murasyn zertteý jáne ony jan-jaqty dáripteý.
Memleket basshysy mýzeidi aralap kórip, Qurmetti qonaqtar kitabyna: "Shyńǵys han ulttyq mýzeii – uly tulǵanyń jáne tutas memlekettiń shejiresi. Rýhaniiat ordasy el igiligine qyzmet ete bersin. Mońǵoliia halqynyń mereii ústem bolsyn!" dep jyly lebizin qaldyrdy.
