Prezident "Ana tili" gazetine bergen suhbatynda Talǵardaǵy tragediia týraly aitty, - dep habarlaidy Dalanews.kz.
– Talǵardaǵy qylmystyq oqiǵa el ishinde úlken dúrbeleń týdyrdy. Jurtshylyq Sizdiń osy jaǵdaiǵa qatysty pikirińizdi bilgisi keledi.
– Qaitalap aitamyn, elimizde «Zań men tártip» qaǵidaty myzǵymastai ornyǵýǵa tiis. Men Talǵar oqiǵasyna deiin jariialaǵan Joldaýymda quqyq qorǵaý organdarynan qylmys pen qaraqshylyqtyń tamyryna balta shabýdy talap ettim.
Qańtar oqiǵasy kezindegi jappai tártipsizdikti qylmystyq toptar jasaǵanyn esten shyǵarmaǵan jón. Memleket uiymdasqan qylmyspen ymyrasyz kúres júrgizýge shamasy jetetinin sońǵy eki jylda anyq kórsetti. Asa qaýipti qylmystyq toptar áshkerelenip, quryqtalyp jatyr. Olardyń sybailastary men qarjy kózderi de anyqtalyp otyr. Byltyr 246 adam qylmystyq jaýapkershilikke tartyldy. Onyń ishinde uiymdasqan qylmystyq toptardyń 30 basshysy bar. Bul jumysty men erekshe baqylaýda ustap otyrmyn.
Talǵardaǵy oqiǵadan keiin quqyq qorǵaý organdary qajetti sharalardyń bárin qabyldady. Kúdiktiler qamaýǵa alyndy. Tergep-tekserý jumystary aiaqtalýǵa jaqyn. Kóp uzamai osy iske qatysty sot bolady. Bul oqiǵaǵa orai quzyrly organdar qabyldaǵan barlyq shara zań talaptaryna tolyq sai keledi. Al basqanyń bári – qur daqpyrt pen teris piǵyldy keibir toptardyń osy jaǵdaiǵa saiasi sipat berýge degen umtylysy ǵana. Buǵan jol berýge bolmaidy.
Osy oqiǵaǵa qatysy bar azamattar boiynsha myna máseleni eske salǵym keledi. Qazaq halqy shetelden kelgen otandastaryn «qandasym» dep, qushaq jaia qarsy aldy. Tarihi Otanyna oralǵandar Qazaqstannyń zańdaryna qatań baǵynyp, qoǵamdyq tártipti saqtap, zańsyz áreketterden aýlaq bolýy kerek. Olar buryn ózderi turǵan elde biliktiń talabyn saqtap, ondai áreket jasaǵan joq qoi?!
