Birikken Ulttar Uiymynyń Bas assambleiasynda sóz sóilegen el prezidenti Qasym-Jomart Toqaev memleketti jańǵyrtýǵa kelgende sóz ben istiń sai bolýy mańyzdy ekenin aitty.
Qazaqstan prezident laýazymynda BUU assambleiasynyń 74-shi sessiiasynda alǵash ret sóz sóilegen Toqaev bizdiń eldi basty baǵdary men saiasi baǵdarlamasy týraly baiandady dep habarlaidy Dalanews.kz.
Memleket basshysy sóziniń álqissasyn memlekettik tilde bastap, ári qarai aǵylshyn tilinde jalǵastyrdy.
"Qazaqstannyń saiasi júiesindegi meniń ustanymym – myqty prezident, abyroily parlament pen jumysyna jaýapty úkimet. Osy ideia bizdiń elimizdiń negizgi talabyna sai dep bilemin. Bul baiandy bolashaqqa negiz bola alady ", – dedi ol.
Budan bólek qyzmetine jańa taǵaiyndalǵan prezident retinde, birinshi kezekte aýqatty, bai memleket qurýdy kózdeitinin aitty.
Toqaev bul maqsatqa – memlekettik reformalardyń kómegimen jetpek.
"Reformalardyń igiligin qazaqstandyqtarǵa kórsetý basty muratym. Elimizde damyǵan ekonomika, sapaly bilim jáne zamanaýi meditsina bolýyn qamtamasyz etý.
Alaida tereń saiasi ózgeris bolmai, elimizdiń tabysty áleýmettik-ekonomikalyq damý tarihy bolmaidy", - dedi Memleket basshysy.
Saiasi tranformatsiia týraly aita otyra Toqaev elimizde demokratiianyń endi-endi qalyptasyp jatqanyn tilge tiek etti.
"Biz árkezde ony (demokratiiany, red.) damytý múmkindigin izdeitin bolamyz. Osy baǵyttaǵy ozyq tájiribeni zerttep, engizip jatyrmyz. Ulttyq qoǵamdyq senim keńesin qurǵanym sonyń dáleli. Bul keńes bilik pen qoǵam arasynda dáneker bolady. Men "ideialar ártúrli bolǵanmen halyq bir" degen ustanymdamyn", - dedi prezident.
Toqaev saiasi ózgeristiń sheńberinde Qazaqstandaǵy quqyq qorǵaý organdaryn kúrdeli reformalar kútip turǵanyn aitty. Sonymen birge eldegi barlyq salada jáne kúndelikti ómirde zań ústemdigin qamtamasyz etýge ýáde etti.
"Men qur beker ýáde bermeimin. Naqty isterdi júzege asyrýdy maqsat tutamyn. Men óz baǵdarlamamdy buljytpai oryndaityn bolamyn", - dedi Memleket basshysy.
