Prezident Qasym-Jomart Toqaev Quryltaidyń basshylyq quramyn qalyptastyrý aiasynda Aibek Arqabaiuly Dádebaidyń kandidatýrasyn Quryltai tóraǵasy qyzmetine usyndy, dep habarlaidy dalanews.kz.
Memleket basshysy jańa Konstitýtsiiaǵa sáikes bilik institýttaryn qalyptastyrý úshin birqatar rásim ótkizý qajet ekenin aitty. Aldymen Quryltaidyń basshylyq quramy sailanyp, onyń qurylymy bekitilýi tiis.
«Joǵaryda atap óttim, jańa Konstitýtsiiaǵa sáikes bilik institýttaryn jasaqtaý jumysyn bastaý úshin biz birqatar rásimdi ótkizýimiz kerek. Eń aldymen, Quryltaidyń basshylyq quramyn sailap, qurylymyn qalyptastyrý qajet. Ózderińizge málim, Konstitýtsiianyń 57-babyna sáikes Quryltai Tóraǵasynyń laýazymyna kandidatýrany Prezident usynady. Men jaýapkershiligi zor bul laýazymǵa Aibek Arqabaiuly Dádebaidyń kandidatýrasyn usynamyn. Sizder bul tulǵany jaqsy bilesizder. Ol memlekettik basqarý júiesinde kóp jyl qyzmet etti. Tájiribesi mol dep aitýǵa bolady. Óziniń bilimdi, otanshyl, adal azamat ekenin naqty isterimen dáleldedi. Sondyqtan ony osy laýazymǵa laiyq dep sanaimyn. Quryltai depýtattarynan Aibek Arqabaiuly Dádebaidyń kandidatýrasyn qoldaýdy suraimyn», – dedi Qasym-Jomart Toqaev.
Prezident budan keiin jańa bilik institýttaryn qalyptastyrýdyń kelesi kezeńderi qalai júzege asatynyn da túsindirdi.
Ata zańǵa sáikes, jańadan sailanǵan Quryltai aldynda Úkimet óz ókilettigin toqtatýy tiis.
«Ata zańǵa sáikes Úkimet jańadan sailanǵan Quryltai aldynda óz ókilettigin toqtatady. Sondyqtan Quryltaidyń qurylymy jasaqtalǵan soń men ózderińizge Vitse-Prezidenttiń jáne Premer-Ministrdiń kandidatýralary boiynsha usynys engizemin. Sodan keiin sizdermen aqyldasyp, Úkimet múshelerin taǵaiyndaimyn. Sonymen qatar jańa laýazymdy – Qaýipsizdik Keńesi tóraǵasynyń orynbasaryn taǵaiyndaimyn. Quryltai men Úkimet quramy tolyq aiqyndalǵan soń jyl saiynǵy Qazaqstan halqyna Joldaýymdy jariialaimyn. Joldaýda kóterilgen barlyq bastamany atqarýshy jáne zań shyǵarýshy bilik ókilderi birlesip, ýaqtyly ári sapaly júzege asyrýǵa tiis. Laýazymdy tulǵalardyń bári, ásirese, qyzmetine endi kirisetin azamattar aldymyzda turǵan ortaq maqsat-mindetterdi bilýi kerek», – dedi Memleket basshysy.
