Qasym-Jomart Toqaev jańadan engizilmek roialti tártibi shikizatty el ishinde tereń óńdeýdi yntalandyrady dep sanaidy. Bul týraly Memleket basshysy búgin ótken Sheteldik investorlar keńesiniń 37-shi plenarlyq otyrysynda aitty. Atalǵan tetik jańa Salyq kodeksi jobasynda qamtylǵan eken, dep habarlaidy Dalanews.kz.
"Taý-ken salasy – elimizdiń óńdeý ónerkásibiniń negizgi tiregi bolyp qala beredi. Qazaqstan taý-ken ónerkásibi men metallýrgiianyń jahandyq mańyzyn túsine otyryp, investorlarǵa ashyq, jan-jaqty zańnama arqyly turaqty ári qolaily iýrisdiktsiia qalyptastyrdy. Júrgizilip jatqan reformalardyń nátijesinde elimizdegi geologiialyq barlaý jumystaryna álemdik iri oiynshylar – Rio Tinto, Fortescue, Ivanhoe, First Quantum jáne Tech Resources kompaniialary keldi. Jańa Salyq kodeksinde shikizatty el ishinde tereń óńdeýdi yntalandyratyn roialti tártibi qarastyrylady. Elimizdiń bai mineraldy-shikizattyq bazasy, jer qoinaýyn paidalanýdaǵy zamanaýi zańnamasy men ashyq salyq júiesi jahandyq tizbektegi mańyzdy mineraldardy jetkizý boiynsha strategiialyq ornymyzdy qamtamasyz etetinine senimdimiz", – dedi Prezident.
Memleket basshysy Qazaqstan temirjol salasyna arnalǵan mashina jasaý boiynsha Wabtec, Alstom jáne Stadler kompaniialarymen tabysty yntymaqtastyq ornatqanyn jetkizdi. Atap aitqanda, Alstom kompaniiasy elimizde servistik ortalyqtar salyp, 2028 jyldan bastap lokomotivterdiń jańa býynyn shyǵarýdy josparlap otyr. Wabtec kompaniiasy balama otynmen júretin jyljymaly quramǵa 200 million dollar investitsiia quidy. Al Stadler Rail kásiporny óndiristik qýaty jylyna 100 vagon shyǵaratyn zaýyt saldy.
Qasym-Jomart Toqaev Qazaqstannyń agroónerkásip kesheniniń joǵary áleýetine toqtaldy. Elimiz egistikke jáne jaiylymǵa jaramdy jer kólemi jaǵynan álemde altynshy oryndy ielenedi, sondai-aq astyq eksporty boiynsha jetekshi on memlekettiń qataryna kiredi. Memleket basshysy PepsiCo, Fufeng Group jáne Dalian Hesheng siiaqty sheteldik investorlardyń tabysty qyzmetin mysalǵa keltirip, olardyń jergilikti ónimge turaqty suranys qalyptastyryp, ozyq tehnologiialardy engizip jatqanyn aitty.
