Memleket basshysy Qasym-Jomart Toqaev Sheteldik investorlar keńesiniń 38-plenarlyq otyrysyn ótkizip, Qazaqstannyń investitsiialyq saiasattaǵy basymdyqtaryn jariialady, dep habarlaidy dalanews.kz.
Prezidenttiń aitýynsha, búginde álemdik ekonomika buryn-sońdy bolmaǵan syn-qaterlerge tap bolyp otyr. Osyndai jaǵdaida Qazaqstan turaqty damý baǵytyn saqtap, halyqaralyq investorlar úshin senimdi áriptes bolyp qala beredi.
«Bizdiń basty mindetimiz – ekonomika men saiasattaǵy jańa jaǵdailarǵa der kezinde beiimdelý. Ekonomikalyq jetistikterimizdiń negizi – saiasi turaqtylyq. Jalpyhalyqtyq referendým nátijesinde qabyldanǵan jańa Konstitýtsiia investorlardyń quqyqtaryn qorǵaýdyń eń joǵary deńgeiin qamtamasyz etedi», – dedi Memleket basshysy.
Toqaev sońǵy jyldary elimizde investitsiialyq ahýaldy jaqsartýǵa baǵyttalǵan aýqymdy reformalar júrgizilgenin atap ótti. Onyń aitýynsha, Investitsiialyq shtabtyń jumysy kúsheitilip, investorlardyń máselelerin jedel sheshýge múmkindik beretin jańa tetikter engizilgen.
Prezident Qazaqstan shikizattyq modelden birtindep alystap, jańa ekonomikalyq ósim kózderin qalyptastyryp jatqanyn aitty.
«Bizdiń maqsatymyz – shikizatqa táýeldilikti azaityp, óńdeý ónerkásibin, tsifrlyq tehnologiialardy, kólik-logistika salasyn, energetikany jáne joǵary qosylǵan quny bar óndiristerdi damytý. Biz investorlarmen uzaq merzimdi ári ózara tiimdi seriktestik ornatýǵa múddelimiz», – dedi Qasym-Jomart Toqaev.
Memleket basshysy Qazaqstannyń investitsiialyq saiasatynda zań ústemdigine, ashyqtyqqa jáne biznesti qorǵaýǵa erekshe kóńil bólinetinin jetkizdi.
«Biz barlyq investorlar úshin ashyq, turaqty ári boljamdy iskerlik orta qalyptastyrýǵa niettimiz. Qazaqstan senimdi seriktes retinde óz mindettemelerin tolyq oryndaidy», – dedi Prezident.
Plenarlyq otyrys barysynda ónerkásip, energetika, kólik, logistika, tsifrlandyrý, jasandy intellekt jáne ekonomikany ártaraptandyrý baǵyttaryndaǵy birlesken jobalar talqylandy. Keńes jumysyna halyqaralyq qarjy uiymdarynyń, iri transulttyq kompaniialardyń jáne sheteldik investorlardyń jetekshileri qatysty.
