Bul aqparat Aqordanyń saitynda jariialandy.
Qaýipsizdik keńesiniń tóraǵasy Qasym-Jomart Toqaev qazirgi ýaqytta eldegi ahýal tolyǵymen turaqtalǵanyn jáne quqyqtyq tártip qaita qalpyna kelgenin atap ótti. Tulǵalardyń, qoǵam men memlekettiń qorǵalý deńgeiin arttyrý úshin barlyq shara qabyldanyp jatyr.
Prezident barlyq memlekettik organdar ótken oqiǵadan sabaq alýǵa tiis ekenin aitty. Jańǵyrtylǵan ulttyq qaýipsizdik júiesi syn-qaterdiń kez kelgen qiyndyǵyna tótep berýge daiyn bolýy qajet.
"Budan bylai qylmystyq toptar men terrorister qalalarymyzdy basyp alyp, azamattar men olardyń otbasylarynyń beibit ómirine qol suǵyp, memlekettiligimizge qaýip tóndirmeýi úshin sharalar qabyldaýǵa mindettimiz. Ulttyq qaýipsizdik júiesin qaita qurý isiniń maqsaty da osy", – dedi Qasym-Jomart Toqaev.
Qaýipsizdik keńesiniń basshysy qaýipsizdikke jaýap beretin barlyq qurylymnyń óz jumystaryn ózgertýi kerek ekenin atap ótti. Bul rette, olardyń ózara is-qimyldary barynsha teńgerimdi bolýǵa tiis.
Memleket basshysy ulttyq qaýipsizdiktiń barlyq baǵytyn nyǵaitý jónindegi naqty sharalardy keshiktirmei júzege asyrýǵa kirisýdi tapsyrdy. Qaýipsizdik keńesi otyrysynyń barysynda ulttyq qaýipsizdik júiesin reformalaýǵa baǵyttalǵan naqty sheshimder qabyldandy.
