Kezdesýde memleketter basshylary Qazaqstan-Resei strategiialyq áriptestiginiń ózekti máselelerin jan-jaqty talqylady. Saýda-ekonomikalyq jáne investitsiialyq yntymaqtastyqty nyǵaitýǵa erekshe nazar aýdaryldy. Atap aitqanda, ónerkásip, energetika, munai-himiia jáne basqa da salalarda birlesken jobalardy júzege asyrý máseleleri qarastyryldy.
Sonymen qatar prezidentter halyqaralyq jáne óńirlik kún tártibindegi ózekti máseleler, sondai-aq kópjaqty qurylymdar aiasyndaǵy ózara is-áreketter týraly pikir almasty.
Qasym-Jomart Toqaev ekijaqty qarym-qatynastardyń qarqyndy damyp kele jatqanyn atap ótti.
– Shyn máninde, Qazaqstan men Resei arasynda strategiialyq seriktestik negizindegi qarym-qatynas ornaǵan. Biyl biz diplomatiialyq qarym-qatynas ornatýdyń óte mańyzdy datasyn atap ótip jatyrmyz. Osydan 30 jyl buryn Dostyq, yntymaqtastyq jáne ózara kómek týraly shartqa qol qoiyldy. 2013 jyly osy Shart elderimiz arasyndaǵy odaqtastyq qatynastar týraly siz qol qoiǵan jańa qujatpen tolyqtyryldy. Sondyqtan qalyptasqan negiz óte jaqsy, – dedi, – Qazaqstan Prezidenti.
Qasym-Jomart Toqaev saýda-ekonomikalyq yntymaqtastyq tabysty damyp kele jatqanyna toqtalyp, ónerkásip kooperatsiiasy bizdiń kóńilimizden shyǵatyndai eleýli nátijelerge jetkenin atap ótti. Memleket basshysynyń aitýynsha, saýda dinamikasy durys jaǵynan damyp jatyr. Byltyr saýda kólemi 24,5 milliard dollardy qurady. Prezident bul kórsetkishpen Resei bizdiń taýar ainalymymyzda birinshi orynda turǵanyn aitty.
Qasym-Jomart Toqaev BUU jáne basqa da halyqaralyq institýttar arqyly belsendi yntymaqtasyp kele jatqanymyzǵa toqtaldy.
– Biyl Qazaqstan TMD-ǵa tóraǵalyq etedi. Qazan aiynda TMD sammiti ótedi. Oǵan ózińiz qatysady degen senimdemiz. Onyń ústine Resei Táýelsiz Memleketter Dostastyǵynda mańyzdy ról atqarady. Bul – shynymen de halyqaralyq formattaǵy yntymaqtastyqtyń basym baǵyty, – dedi Prezident.
Memleket basshysy qazirgi geosaiasi jaǵdaidaǵy ekijaqty yntymaqtastyqty odan ári nyǵaitý máselelerine nazar aýdardy.
– Geosaiasi jaǵdaidyń ereksheligi úkimetterimizge qosymsha nusqaýlar berý úshin kelisip alý qajet ekenin kórsetip otyr. Olar bir-birimen tabysty qyzmet etip keledi. Degenmen ómirdiń ózi jańa mindetter qoiady jáne olar sheshýdi qajet etedi. Jalpy, bizdiń yntymaqtastyǵymyzdyń damyp kele jatqanyna qanaǵattanýǵa tolyq negiz bar.
Men bul turǵyda sizben kelisemin. Bizdi ortaq shekara biriktiredi. Ol – álemdegi eń uzyn, qurlyqtaǵy tolyǵymen delimitatsiialanǵan shekara.
Bizdiń yntymaqtastyǵymyzdyń bolashaǵyna qatysty pessimistik boljamdar jasaýǵa, árine, negiz joq! Men Qazaqstan Respýblikasynyń Prezidenti retinde barlyq salalardaǵy ekijaqty yntymaqtastyǵymyzǵa qosymsha serpin berýge niettimin, – dedi Qasym-Jomart Toqaev.
https://www.youtube.com/watch?v=m97DdbIfctM
Óz kezeginde Vladimir Pýtin Qasym-Jomart Toqaevqa shaqyrýyn qabyl alyp, Sochige kelgenine alǵysyn bildirdi.
– Shaqyrýymdy qabyl alǵanyńyzǵa rahmet. Biz ekeýimiz únemi kezdesip turamyz. Jaqynda ǵana júzdesken edik, biraq biz Sochide kezdesýge kelistik. Aldymyzda óte aýqymdy jumys bar. Al biylǵy jyl erekshe. Biz qazan aiynda diplomatiialyq qarym-qatynastyń 30 jyldyǵyn atap ótemiz. Osy dataǵa orai túrli is-sharalar josparlanyp otyr.
Bizdiń ministrlikter men vedomstvolar belsendi jumys istep jatyr. Úkimetaralyq komissiia qarqyndy jumys istep keledi.
Syrtqy ister, qorǵanys ministrlikteri birlesip túrli is-sharalardy, sonyń ishinde UQShU aiasyndaǵy birlesken oqý-jattyǵýlardy jáne taǵy basqalaryn daiyndap jatyr. Taýar ainalymy ósip keledi. Byltyr 34,4 paiyzǵa ósse, biyl bes aida 9 paiyzǵa derlik, 8,8 paiyzǵa ósti. Investitsiialar eki jaqtan da artyp keledi. Menińshe, Resei investitsiiasy 18 milliard dollarǵa jetti, al Qazaqstannyń Reseige investitsiia tórt jarym milliard shamasynda. Qazaqstannyń saýda-ekonomikalyq seriktesteri arasynda Resei birinshi orynda keledi. Biz sondai-aq jaqsy iri jobalardy ázirlep jatyrmyz. Joǵary tehnologiialyq salalarda, sonyń ishinde ǵarysh salasynda jumys isteimiz.
Jalpy, jumys barlyq baǵyttar boiynsha aitarlyqtai qarqyndy ári oń baǵytta júrip jatyr.
Bizdiń kezdesýimiz, árine, bizdiń senimdi strategiialyq seriktestigimizdi damytýǵa qosymsha serpin beretinine óte qýanyshtymyn, – dedi Resei basshysy.
https://dalanews.kz/news/80472-turgyn-uy-kommunaldyq-sharuashylyq-sal
