11 qarashada Qasym-Jomart Toqaev Resei Prezidenti Vladimir Pýtinniń shaqyrýymen Máskeýge memlekettik saparmen bardy, dep habarlaidy Dalanews.kz.
Vnýkovo-2 áýejaiynda mártebeli meimannyń kelýine orai Máskeý garnizonynyń qurmet qaraýyly men áskeri úrmeli orkestri sap túzedi.
Memleket basshysyn Resei Federatsiiasy Úkimeti Tóraǵasynyń birinshi orynbasary Denis Mantýrov pen basqa da resmi tulǵalar qarsy aldy. Eki eldiń memlekettik ánurandary shyrqaldy.
Prezident Máskeý memlekettik halyqaralyq qatynastar institýtynyń stýdentterimen áńgimelesti.
Stýdentter Memleket basshysyna qazaqsha til qatty. Olar Prezident Qasym-Jomart Toqaevtyń kitaptarynda kórinis tapqan diplomatiia men ashyqtyq qaǵidalary Máskeý memlekettik halyqaralyq qatynastar institýtynda úlgi retinde oqytylatynyn jetkizdi.
Sonymen qatar jastar Abai Qunanbaiuly shyǵarmashylyǵyna zor qyzyǵýshylyqpen qaraitynyn aitty.
"Aqynnyń «Adamzattyń bárin súi, baýyrym dep» degen dostyq týraly oi oramdary óte erekshe. Resei men Qazaqstan – máńgilik dostyqtyń qos qanaty dep esepteimiz. Eki eldi, eki halyqty riiasyz, shynaiy dostyq qarym-qatynas bailanystyrady", – dedi jastar.
Memleket basshysy stýdentterdiń qazaq tilin úirenýge degen yntasyna joǵary baǵa berip, olarǵa sáttilik tiledi.
"Máskeý memlekettik halyqaralyq qatynastar institýty – óte bedeldi joǵary oqý orny. Búkil álemge tanymal. Qazaqstan búginde derbes memleket. Meniń oiymsha, Máskeý memlekettik halyqaralyq qatynastar institýtynda alǵan bilimderińiz bolashaqta mol paidasyn tigizedi. Óitkeni túrli elder týraly, onyń ishinde Reseidiń burynnan kele jatqan odaqtasy Qazaqstan jaiynda kóp maǵlumat bilý Sizderge keiin jumysqa ornalasýǵa, sondai-aq álemde jáne óńirlik deńgeide básekege qabiletti maman bolýǵa kómektesedi", – dedi Prezident.
Al Astana ýaqyty boiynsha keshki 23.00-ge qarai Qazaqstan men Resei prezidentteri beiresmi kezdesý ótkizdi.
Qasym-Jomart TOQAEV:
"Qurmetti Vladimir Vladimirovich, eń aldymen, Máskeýge, osynaý qasietti jerge tabanym tigen sátten bastap kórsetilgen erekshe syi-qurmet úshin Sizge rizashylyǵymdy bildiremin. Jańa ǵana protokol aspektileri jóninde aityldy. Shyn máninde, Resei astanasyndaǵy ystyq yqylas meni qatty tańǵaldyrdy ári qýantty. Ekijaqty yntymaqtastyq strategiialyq seriktestik, odaqtastyq qatynastar sipatyna ie. Barlyq baǵytta birlese jumys atqaryp kelemiz. Memleketterimiz arasynda eshqandai túitkil joq. Másele týyndaǵan kúnniń ózinde prezidentter men úkimetter basshylarynyń kúsh-jigeri arqasynda oń sheshimin tabady. Sizdiń shaqyrýyńyzdy zor yqylaspen qabyl aldym. Rasynda, búgin beiresmi jaǵdaida pikir almasamyz. Meniń Ózińizben talqylaǵym keletin biraz pikir-paiymym bar", - dedi memleket basshysy.
Vladimir PÝTIN:
"Qurmetti Qasym-Jomart Kemeluly, eń aldymen, Sizge ýaqyt taýyp, keliskenimizdei, memlekettik saparmen kelgenińiz úshin alǵys aitamyn. Buǵan shyn júrekten qýanyshtymyn. Árine, biz udaiy bailanystamyz. Alaida memleketaralyq qatynastarda mundai protokoldyq dúnieler de mańyzdy. Búgin beiresmi jaǵdaida kezdesip, barlyq ózekti másele boiynsha áńgimelesemiz. Al erteń áriptestermen birge ekijaqty qarym-qatynastyń kún tártibin qarastyramyz jáne perspektivti baǵyttarǵa nazar aýdaramyz. Jalpy alǵanda, biz osy jyldy óte jaqsy nátijelermen aiaqtaimyz, sondai-aq taiaý keleshekke arnalǵan jospardy oryndaimyz dep oilaimyn".
Qasym-Jomart Toqaev pen Vladimir Pýtin Kremlde 2,5 saǵattan asa ýaqyt beiresmi jaǵdaida emen-jarqyn áńgimelesti.
