Qazaqstan men Resei prezidentteri kelissóz júrgizdi, dep habarlaidy Dalanews.kz.
Qasym-Jomart TOQAEV:
– Vladimir Vladimirovich, Sizge alǵysym sheksiz. Erekshe qonaqjailyǵyńyz úshin shyn júrekten rizashylyǵymdy bildiremin. Resei tarapy sapardy uiymdastyrýǵa muqiiat ázirlengenin kórdik. Is-sharalar jan-jaqty oilastyrylǵan. Biz úshin Resei Federatsiiasyna memlekettik sapar – biylǵy eń aitýly oqiǵa. Ministrlikter, vedomstvolar arqyly konsýltatsiialar júrgizip, tyńǵylyqty daiyndaldyq. Óitkeni yntymaqtastyq aýqymy óte keń. Resei Federatsiiasymen barlyq salada tyǵyz bailanys ornattyq. Siz jańa ǵana qandai jumys atqarylǵany, aldymyzda qandai mindetter turǵany jóninde egjei-tegjeili aittyńyz. Oǵan alyp-qosarym joq. Shyn máninde, memleketterimiz arasyndaǵy strategiialyq seriktestik pen odaqtastyq qatynastar – saiasi sypaiylyq úshin aitylǵan sóz emes, ózara yntymaqtastyǵymyzdyń mánin ashatyn sipattaý. Sondyqtan ózara qarym-qatynasymyzda eshqandai túitkil joq dep senimmen aitýǵa bolady. Álginde ózińiz aitqandai, barlyq sala tabysty damyp keledi. Taýar ainalymyn 30 milliard dollarǵa deiin arttyrý mindetin qoidyq. Meniń oiymsha, bul qol jetkizýge bolatyn kórsetkish. Taiaý keleshekte maqsatymyzǵa oryndalady dep oilaimyn. Resei Federatsiiasymen atom energiiasy salasyndaǵy yntymaqtastyqqa airyqsha toqtalǵym keledi. Kóp uzamai «Rosatommen» stansa qurylysyn bastaýǵa múmkindik beretin óte mańyzdy kelisimderge qol qoiamyz. Bul – serpindi joba. Óitkeni atom elektr stansasy ǵana salynbaidy, múldem jańa sala paida bolady. Bilim salasyndaǵy yqpaldastyǵymyzdy atap ótkim keledi. Reseidiń 9 joǵary oqý orny, sonyń ishinde tanymal ýniversitetter Qazaqstanda filialdaryn ashty. Bul úshin Resei Federatsiiasynyń bilim salasy ókilderine rizashylyǵymdy bildiremin. Sonymen qatar Omby ýniversiteti janynan ál-Farabi atyndaǵy QazUÝ filialy ashyldy. Bul da eleýli oqiǵa. Jalpy, bilim salasyna erekshe mán beremin. Óitkeni jastarymyzǵa jaǵdai jasaý kerek dep sanaimyn. Bizdiń maqsatymyz – jastarǵa Qazaqstan men Reseidiń jańa tarihi jáne geosaiasi kezeńdegi yntymaqtastyǵy men dostyq bailanystaryn amanattaý. Óskeleń urpaq mundai qarym-qatynassyz osynaý almaǵaiyp zamanda ómir súrý múmkin emes ekenin túsinýge tiis. Qazaqstan Prezidentiniń Resei Federatsiiasyna memlekettik sapary bul mindetti belgili bir deńgeide oryndap otyr. Osy baǵyttaǵy jumys jalǵasyn tabady dep oilaimyn. Sol sebepti Sizdi Qazaqstanǵa memlekettik saparmen kelýge shaqyramyn.
Vladimir PÝTIN:
– Qurmetti Qasym-Jomart Kemeluly, Sizdi Máskeýde, Kreml saraiynda qarsy alǵanyma óte qýanyshtymyn. Búgin Máskeýge Úkimet múshelerinen jáne biznes ókilderinen quralǵan úlken delegatsiia kelgenin kórip otyrmyz. Qazaqstanmen aradaǵy qarym-qatynasymyz qarqyndy damyp keledi. Negizgi qujattarda jazylǵan ýaǵdalastyqtardyń ózektiligin ómirdiń ózi kórsetýde. Qazaqstan men Resei – jaqyn seriktes, dostas ári odaqtas elder. Bul naqty isterden baiqalady. Resei – Qazaqstannyń jetekshi saýda-ekonomikalyq seriktesteriniń biri jáne basty investorlar qatarynda. Byltyr saýda ainalymy 27 milliard dollardan asty. Biylǵy 9 aida bul kórsetkish 20 milliard dollarǵa jetti. Kóptegen reseilik kompaniia Qazaqstanda tabysty jumys istep jatyr. Qazaqstannyń biznes ókilderi de Reseide óz kásipterin ashyp, belsendi júrgizýde. Biz halyqaralyq arenada tyǵyz bailanys ornattyq. Birqatar óńirlik uiymǵa múshemiz. Aldaǵy kúnderi Bishkekte ótetin UQShU forýmynda, odan keiin Sankt-Peterbýrgtegi TMD-ǵa jáne EAEO-ǵa múshe memleketter basshylarynyń dástúrli basqosýlarynda kezdesemiz. Baǵdarlamamyz óte mazmundy, onyń barlyǵy oryndalyp jatyr. Sizdiń búgingi saparyńyzdyń qorytyndysy boiynsha memorandýmdar ázirlendi. Bul bailanystarymyzdy joǵary memleketaralyq deńgeige shyǵarýdy kózdeidi. Árine, bul bizdi qýantady. Qazaqstanmen qarym-qatynasty odan ári damytýǵa umtylamyz.
