Qasym-Jomart Toqaev pen Vladimir Pýtin kelissózderdi resmi delegatsiia músheleriniń qatysýymen keńeitilgen quramda jalǵastyrdy, dep habarlaidy dalanews.kz.
Memleket basshysy Resei Prezidentiniń Qazaqstanǵa jasaǵan sapary jan-jaqty strategiialyq seriktestik jáne odaqtastyq rýhyndaǵy qarym-qatynastardyń erekshe sipatyn kórsetetinin atap ótti.
"Qazaqstan úshin eń áýeli Reseimen jaqyn ári dostyq bailanystar airyqsha mańyzdy desek, artyq bolmaidy. Birlesken kúsh-jigerdiń arqasynda ekijaqty yntymaqtastyq barlyq salada senimdi túrde damyp keledi ári ony memleketaralyq bailanystardyń naǵyz úlgisi dep ataýǵa bolady. Biz shaǵyn quramda nátijeli kelissóz júrgizip, san qyrly seriktestigimizdi nyǵaitýǵa nietti ekenimizdi rastadyq. Elderimizdiń arasynda eshqandai sheshilmegen másele joq. Tek oń dinamika baiqalady. Osy qarqyndy saqtap, jańa jobalar men bastamalar arqyly yntymaqtastyqty damyta beremiz. Bul oraida búgin qabyldanatyn "Qazaqstan jáne Resei halyqtary arasyndaǵy dostyq pen tatý kórshiliktiń jeti negizi týraly" birlesken málimdemeniń mańyzyn erekshe atap ótkim keledi. Atalǵan qujat qarym-qatynasymyzdyń sipatyn tanytady jáne ony uzaqmerzimdi negizde tereńdetýge beiil ekenimizdi kórsetedi", – dedi Prezident.
Memleket basshysynyń aitýynsha, álemdegi kúrdeli ahýalǵa qaramastan, ekijaqty yqpaldastyq, ásirese, ekonomika salasynda tabysty órbip keledi. Óńiraralyq yntymaqtastyq forýmdaryn ótkizý dástúrge ainaldy.
"Resei Qazaqstan ekonomikasyna qarjy quiǵan elderdiń arasyndaǵy eń iri investor sanalady. Qazaqstannyń Resei ekonomikasyna salǵan qarjysy 9 milliard dollardan asty. Bul – óte jaqsy kórsetkish, eki el prezidentteriniń ákimshilikteri men úkimetteriniń birlese atqarǵan jumysynyń nátijesi. Osy qarqyndy ary qarai jalǵastyrýǵa ýaǵdalastyq. Búginde investitsiianyń jalpy kólemi 53 milliard dollar bolatyn 177 birlesken jobanyń pýly jasaqtaldy, onyń ishinde 122-si iske asyryldy, iaǵni operatsiialyq kezeńge ótti", – dedi Qasym-Jomart Toqaev.
Vladimir Pýtin teń quqyly jáne ózara qurmetke negizdelgen Resei men Qazaqstannyń qarym-qatynasy qarqyndy damyp kele jatqanyn jetkizdi
"Byltyr Máskeýge memlekettik saparyńyz barysynda jasaǵan birlesken málimdemede bailanystarymyz jan-jaqty strategiialyq seriktestik jáne odaqtastyq deńgeiine kóterilgenin atap óttik. Bul shyn máninde solai. Biz barlyq baǵytta jumys júrgizip jatyrmyz. Resei jáne Qazaqstan halyqtary arasyndaǵy dostyq pen tatý kórshiliktiń jeti negizi jaiynda mańyzdy birlesken málimdeme qabyldaimyz. Sonymen qatar kóptegen úkimetaralyq, vedomstvoaralyq jáne kommertsiialyq kelisimder daiyndaldy. Bul qujattar ekonomika men energetikadan bastap, mádeni-gýmanitarlyq qatynastarǵa deiingi yntymaqtastyqtyń barlyq salasyn qamtidy. Munyń bári ózara yqpaldastyǵymyzdyń irgesin nyǵaitýǵa septigin tigizetinine senimdimin. 70 investitsiialyq joba júzege asyrylyp jatyr. Bul – aýqymdy jumystyń bastaýy ǵana. Ózara yntymaqtastyǵymyzdyń jaqsy nátijege qol jetkizetin perspektivti baǵyttary baiqalady", – dedi Resei prezidenti.
Budan bólek, kezdesýde ózara tiimdi yntymaqtastyqty keńeitý jáne óndiris, energetika, kólik-logistika, agroónerkásip kesheni, tsifrlandyrý salalaryndaǵy birlesken jobalardy júzege asyrý perspektivasy talqylandy.
