Otyrys barysynda prezident Densaýlyq saqtaý ministri Aleksei Tsoidyń esebin tyńdap, oǵan tapsyrmalar júktedi. Toqaevtyń sózinshe, koronavirýsqa da, pnevmoniiaǵa da «kóz jumýǵa» bolmaidy jáne barlyq kúshti dertpen kúreske jumsaý kerek.
Sonymen qatar, memleket basshysy ministrlerden «SK-Farmatsiia» qyzmeti týraly surady.
– «SK-Farmatsiia» qandai uiym, onda kim jumys isteidi? Olar nege únemi senimdi aqtamaidy? Bul uiym jaily sońǵy 15 jyl boiy estip júrmin. Barlyǵy sonda jumys istegisi keledi. Uiym ainalasynda toptyq múddeler baiqalady. Ne istemekshisizder? – dedi Memleket basshysy.
Prezidentke jaýap bergen Densaýlyq saqtaý ministri «SK-Farmatsiia» dárilerdi memlekettik segmentke, ásirese, aýrýhanalar men klinikalarǵa jetkizetinin málimdedi.
Tsoidyń sózinshe, kompaniia preparattardy zaýyttardan tikelei satyp alady jáne otandyq óndirýshilerge qoldaý kórsetedi.
– Osy máselege nazar aýdaryńyzdar. Aldymen kadrlyq máselelerdi sheshý kerek. Maǵan qazir «SK-Farmatsiianyń» qyzmetin aitty. Onyń nemen ainalysatynyn bilemiz, biraq qalai ainalysady? Mine, másele osynda. Odan bólek, meniń jemqorlyqqa qarsy agenttikke, Shpekbaevqa tapsyrmam bar. Bul uiymdy sybailas jemqorlyq táýekelderi turǵysynan tekserý kerek, – dedi prezident.
Memleket basshysy Qazaqstanǵa Ózbekstannan, Katar men Birikken Arab Ámirliginen jáne basqa da elderden gýmanitarlyq kómek kelip jatqanyn aita ketti.
– Mundai aqparatty tyńdaý da yńǵaisyz. Osyndai jaǵdaiǵa da jettik. Osynshama memleketten dári-dármegi bar gýmanitarlyq kómek alyp otyrmyz. Ózimizde eshteńe joq. Bútin bir uiym memlekettik uiymdar boiynsha dárilik buiymdardy bólýmen ainalysady. Onda kóptegen adam jumys istep jatyr. Joǵary jalaqy alyp otyr. Munyń barlyǵy ne úshin kerek? Anyqtańyzdar, – dedi Toqaev.
Keiinnen prezident Alik Shpekbaevqa kompaniianyń jumysyn tekserýdi taǵy da tapsyrdy.
