Prezident Qasym-Jomart Toqaev Ortalyq Aziia jáne Ázerbaijan memleketteri basshylarynyń beiresmi Konsýltativtik kezdesýine qatysty, dep habarlaidy dalanews.kz.
Qasym-Jomart Toqaev jahandyq úderisterde Ortalyq Aziianyń róli senimdi túrde artyp, álemdik arenadaǵy aimaqtyń úni aiqyn ári salmaqtyraq shyǵa bastady dep sanaidy.
"Buǵan Qyrǵyzstannyń Birikken Ulttar Uiymy Qaýipsizdik Keńesiniń turaqty emes múshesi retinde sailanýy (2027-2028 jyldarǵa) jarqyn mysal bola alady. Oraily sátti paidalana otyryp Qyrǵyz Prezidenti qurmetti Sadyr Nurǵojauly Japarovty jáne barsha qyrǵyz halqyn osy tarihi jetistikpen quttyqtaimyn", – dedi Prezident.
Memleket basshysy yqpaldastyqtyń barlyq negizgi máselesi byltyr Tashkentte ótken kezdesýde egjei-tegjeili talqylanǵanyn atap ótti.
"Sol kezde aitylǵan bastamalar, sonyń ishinde Konsýltativtik kezdesýlerdi institýtsionaldyq turǵydan damytý máselesi áli de ózekti jáne ony iske asyrý maqsatynda birlese jumys isteýimiz qajet. Qazaqstan qol jetkizgen kelisimderge yntaly, elderimiz arasyndaǵy dostyq, tatý kórshilik jáne strategiialyq seriktestikti nyǵaitýǵa baǵyttalǵan jasampaz bastamalardy odan ári ilgeriletýdi kózdeidi. Birlesken kúsh-jiger arqyly ortaq progress jolynda budan da biik belesterdi baǵyndyratynymyzǵa senimdimin. Sóz sońynda túrikmen dos-baýyrlarymyzǵa Konsýltativtik kezdesýler formatyndaǵy aldaǵy is-sharalardy ótkizýde tabys tileimin", – dedi Qasym-Jomart Toqaev.
Sonymen qatar, Ortalyq Aziia jáne Ázerbaijan memleketteri basshylarynyń beiresmi Konsýltativtik kezdesýiniń qorytyndysy boiynsha Sholpan-Ata deklaratsiiasy qabyldandy.
