Memleket basshysy munai-gaz salasynyń qyzmetkerlerin kásibi merekesimen quttyqtady, dep habarlaidy Dalanews.kz.
Aqordada ótken saltanatty jiynda Prezident Qasym-Jomart Toqaev munai-gaz kesheni el ekonomikasynyń asa mańyzdy salasy ekenin atap ótti.
– Sizder osy salada adal eńbek etip, memleketimizdiń damýyna mol úles qosyp kelesizder. Bul naǵyz eńbek adamdaryna tán qasiet dep sanaimyn. Jalpy, elimizdegi munai-gaz ónerkásibiniń ózindik dástúri, bai tarihy bar. Osy salanyń qalyptasyp, órkendeýine birneshe býyn ókilderi zor eńbek sińirdi. Sizderdi aǵa býynnyń laiyqty izbasary deýge bolady. Qazir munai-gaz salasynda eki júz myńnan astam adam jumys isteidi. Sizderdiń tabandy eńbekterińizdiń arqasynda Qazaqstanymyz órkendep, kórkeiip keledi. Men muny joǵary baǵalaimyn. Bárińizge shynaiy rizashylyǵymdy bildiremin, – dedi Qasym-Jomart Toqaev.Prezident byltyr qazaq munaiynyń 125 jyldyǵy atalyp ótkenin eske salyp, biyl da osy sala úshin aitýly jyl ekenine toqtaldy.
– Atyraý munai óńdeý zaýytynyń ashylǵanyna 80 jyl toldy. Shymkent munai óńdeý zaýytyna 40 jyl, al «QazaqGaz» ulttyq kompaniiasyna 25 jyl tolyp otyr. Bul merekelik kúnder elimizdiń munai-gaz salasynyń mán-mańyzyn kórsetedi. Munai men gaz – strategiialyq mańyzy bar resýrs, bul – jurtshylyqqa belgili derek. Sebebi bul sala elimizdiń ósip-órkendeýine airyqsha yqpal etti. Táýelsizdik jyldary qara altynnyń igiligin molynan kórdik. Qazirgi tańda bul sala qarqyndy damyp keledi. Qazaqstan álemdik munai naryǵyndaǵy jetekshi memlekettiń biri sanalady. Egemendik kezeńinde elimizdegi munai óndirisi tórt ese ósti. Jaqyn arada munai óndirý kólemin jylyna 100 million tonnaǵa jetkizemiz, – dedi Memleket basshysy.
