«Prezident janynan memlekettik komissiia quryldy. Ony Premer-ministr basqarady. Barlyq qajetti aldyn alý sharalary júzege asyrylady. Qoǵamdyq tártip qatań baqylaýǵa alynady. Kóptegen azamattarymyzdyń aldaǵy mereke kúnderine orai jospar quratynyn túsinemin. Azamattarymyzdyń otbasylyq sharalardy ótkizbegeni jón dep sanaimyz», – degen Prezident saqtyq sharalary májbúrli áreket ekenine toqtalyp ótti.
El iri saýda nysandarynyń jumysyn shekteýge májbúr. Biraq azyq-túlik dúkenderi men bazarlar óz jumysyn jalǵastyra beredi.
– Memlekettik shekara boiyndaǵy ótizý beketterinde, áýejailarda, vokzaldarda sanitarlyq rejim kúsheitildi. Meniń tapsyrmam boiynsha Úkimettiń qorynan qarajat bólindi. Aýrýhanalarda oryn jetkilikti. Osy sharalardyń barlyǵy azamattardyń densaýlyǵy úshin jasalyp otyrǵan óte mańyzdy qadamdar. «Saqtanǵandy Qudai saqtaidy». Bul indetpen kúresýge tolyq múmkindigimiz bar ekenin basa aitqym keledi. Bul ýaqytsha dúrbeleń, bul daǵdarysty abyroimen ótkerýimiz kerek. Ár adam barynsha saqtanyp, virýstyń taralamaýyna atsalysýy kerek. Elimizdiń barlyq azamaty ýákiletti organdardyń qyzmetine qolǵabys etedi dep senemin, – dedi úndeýinde Qasym-Jomart Toqaev.
Toqaev qysyltaiań sátte biznesti qoldaýǵa qansha qarajat bólinetinin aitty.
«Otandyq kásipkerlerdi qoldap, jańa jumys oryndaryn qurý úshin keminde 30 mlrd teńge bólinedi. Biznesti kreditteý deńgeiin tómendetýge bolmaidy. Ishki naryqty toltyryp, óndiristi yntalandyrý úshin «Qarapaiym zattar ekonomikasy» baǵdarlamasyn qarjylandyrý jalǵasady», – dedi Prezident Qasym-Jomart Toqaev.
Televiziialyq úndeýinde Prezident koronavirýspen kúresý úshin Qazaqstannyń qorynda aqsha bar ekenin jáne azyq-túlik qory da jetkilikti ekenin atap ótti.
«Biz el-jurtty dúrliktiretin, arandatatyn áreketterge tyiym salamyz. Jalǵan aqparat taratyp, dúrbeleń týǵyzatyndar jaýapkershilikke tartylady», - dedi Toqaev.
Esterińizge sala ketsek, Dúniejúzilik densaýlyq saqtaý uiymynyń jańa COVID-19 koronavirýsyn pandemiia dep jariialaýyna bailanysty, QR Prezidentiniń Jarlyǵymen azamattardyń ómiri men densaýlyǵyn qorǵaý maqsatynda Qazaqstan Respýblikasynyń barlyq aýmaǵynda 2020 jylǵy 16 naýryz 08 saǵat 00 minýt pen 2020 jylǵy 15 sáýir 07 saǵat 00 minýt aralyǵynda tótenshe jaǵdai engizildi. Sondai-aq Qazaqstan azamattaryna 15 sáýirge deiin el aýmaǵynan shyǵýǵa tyiym salyndy.
