Qasym-Jomart Toqaev Atom energiiasy jónindegi halyqaralyq agenttiktiń (MAGATE) bas direktory Rafael Grossidi qabyldap, ony I dárejeli «Dostyq» ordenimen marapattady, dep habarlaidy dalanews.kz.
Aqorda málimetinshe, kezdesý barysynda Qazaqstan men MAGATE arasyndaǵy yntymaqtastyqtyń keleshegi, iadrolyq qaýipsizdik máseleleri jáne halyqaralyq kún tártibindegi ózekti taqyryptar talqylanǵan.
Prezident Qazaqstannyń MAGATE-men uzaq jyldar boiy qalyptasqan seriktestikti joǵary baǵalaitynyn aityp, Rafael Grossidiń jetekshiligimen uiymnyń iadrolyq qaýipsizdikti nyǵaitýǵa jáne atom energiiasyn beibit maqsatta paidalanýǵa eleýli úles qosqanyn atap ótken.
Qasym-Jomart Toqaev Rafael Grossidiń 2023 jylǵy sáýirde Qazaqstanǵa jasaǵan alǵashqy sapary ekijaqty bailanystardy damytýǵa tyń serpin bergenin jetkizgen. Sondai-aq Prezident Qazaqstannyń iadrolyq qarýsyzdaný jáne jappai qyryp-joiatyn qarýdy taratpaý máseleleri boiynsha MAGATE-men ustanymy uqsas ekenin aitqan.
Memleket basshysy qazirgi álemdegi geosaiasi jaǵdaidyń kúrdeli ekenin atap ótip, jahandyq qaýipsizdikke qatysty túitkilderdi sheshý úshin halyqaralyq deńgeide kúsh biriktirý qajet ekenin málimdegen.
Kezdesý barysynda Qazaqstan men MAGATE arasyndaǵy yntymaqtastyqty tereńdetýge arnalǵan 2036 jylǵa deiingi jol kartasyna, sondai-aq iadrolyq meditsina men ǵylym salasyna qatysty birqatar qujattarǵa qol qoiylǵany aityldy.
Óz kezeginde Rafael Grossi Qazaqstannyń jahandyq iadrolyq qaýipsizdikti nyǵaitýdaǵy rólin joǵary baǵalap, elimizdiń jappai qyryp-joiatyn qarýdy taratpaý baǵytyndaǵy bastamalaryn mańyzdy dep ataǵan.
MAGATE basshysy Qasym-Jomart Toqaevtyń halyqaralyq deńgeidegi bedeline de toqtalyp, Prezidenttiń iadrolyq qaýipsizdik, dialog jáne kópjaqty yntymaqtastyqty ilgeriletýdegi dáiekti saiasatyn erekshe atap ótken.
Sonymen qatar agenttik jetekshisi Qazaqstandy AES salý boiynsha ótken jalpyhalyqtyq referendým nátijesinde atom energetikasyn damytý baǵdarlamasynyń iske asa bastaýymen quttyqtaǵan.
Prezident óz kezeginde Qazaqstannyń halyqaralyq kelisimder bolǵan jaǵdaida Irannyń iadrolyq baǵdarlamasyna qatysty máseleni sheshýge atsalysýǵa daiyn ekenin taǵy da rastaǵan.
Rafael Grossi bul bastamaǵa qoldaý bildirip, Qazaqstannyń mundai kelisimderdi júzege asyrý úshin jetkilikti saiasi bedeli, infraqurylymy jáne ǵylymi-tehnikalyq áleýeti bar ekenin aitqan.
Kezdesý sońynda Qasym-Jomart Toqaev Qazaqstan Respýblikasy men Atom energiiasy jónindegi halyqaralyq agenttik arasyndaǵy yntymaqtastyqty nyǵaitýǵa qosqan eleýli úlesi úshin Rafael Grossidi I dárejeli «Dostyq» ordenimen marapattady.
Sondai-aq Memleket basshysy Rafael Grossige BUU Bas hatshysy laýazymyna úmitker retinde sáttilik tilegen.
