Prezident Qasym-Jomart Toqaev pen Kipr Respýblikasynyń prezidenti Nikos Hristodýlidis Astanada keńeitilgen quramda kelissóz ótkizdi. Kezdesýde ekijaqty yntymaqtastyqty damytý, investitsiialyq bailanystardy keńeitý jáne jańa ekonomikalyq jobalardy iske asyrý máseleleri talqylandy, dep habarlaidy dalanews.kz.
Aqorda málimetinshe, memleket basshysy Kipr prezidentiniń Qazaqstanǵa jasaǵan saparyn tarihi oqiǵa dep atap ótti. Onyń aitýynsha, bul diplomatiialyq qarym-qatynas ornaǵaly beri Kipr basshysynyń elimizge alǵashqy resmi sapary bolyp otyr.
«Biz jańa ǵana shaǵyn quramda mazmundy kelissóz júrgizip, ekijaqty yntymaqtastyqty odan ári damytýǵa beiil ekenimizdi rastadyq. Qazaqstan ózara tiimdi kelisimderdi bekitýge daiyn. Óitkeni elderimiz arasynda qalyptasqan dostyqty qurmet tutamyz», - dedi Toqaev.
Prezidenttiń aitýynsha, sapardyń Kiprdiń Eýropalyq odaq keńesine tóraǵalyq etip otyrǵan kezeńmen tuspa-tus kelýi erekshe simvoldyq mánge ie. Sonymen qatar ol Kiprdiń halyqaralyq arenadaǵy bedeli sońǵy jyldary aitarlyqtai artqanyn atap ótti.
Qazaqstan basshysy eki el arasyndaǵy saiasi bailanystardyń turaqty damyp kele jatqanyn aityp, Astana men Nikosiiada elshilikterdiń ashylýy yntymaqtastyqty jańa deńgeige kóteretinin jetkizdi. Sondai-aq Larnaka men Astana arasyndaǵy alǵashqy tikelei áýe reisiniń iske qosylýy bailanystardy nyǵaitýdaǵy mańyzdy qadam retinde baǵalandy.
«Qazirgi saýda kólemi ekonomikalarymyzdyń naqty áleýetine tolyq sai emes ekenin túsinemiz. Sondyqtan ortaq maqsatymyz – saiasi erik-jigerimizdi naqty ekonomikalyq nátijege ainaldyrý», - dedi Memleket basshysy.
Toqaev Kiprden Qazaqstanǵa aýqymdy biznes delegatsiiasynyń kelgenine nazar aýdaryp, bul kiprlik investorlardyń elimizge qyzyǵýshylyǵy artyp kele jatqanyn kórsetetinin aitty. Onyń pikirinshe, aldaǵy ýaqytta tsifrlandyrý, jasandy intellekt, logistika, qarjy, týrizm jáne bilim berý salalaryndaǵy áriptestikti kúsheitý qajet.
Prezident Qazaqstannyń kiprlik kompaniialardyń investitsiialyq jobalaryn qoldaýǵa daiyn ekenin málimdedi. Onyń sózinshe, sheteldik investorlar úshin qolaily jaǵdai jasaý memlekettik saiasattyń basym baǵyttarynyń biri bolyp qala beredi.
Óz kezeginde Nikos Hristodýlidis Qazaqstandy Eýropalyq odaqtyń Ortalyq Aziiadaǵy mańyzdy strategiialyq seriktesi dep atady. Onyń aitýynsha, Kipr qazaqstandyq kompaniialar úshin Eýropa naryǵyna shyǵatyn senimdi alań bola alady.
«Qazaqstan Eýropa Odaǵynyń strategiialyq seriktesi sanalady. Kipr – Eýropa Odaǵyna múshe memleket retinde qazaqstandyq investorlar men kompaniialar úshin eýropalyq naryqqa shyǵatyn senimdi qaqpa», - dedi Kipr prezidenti.
Hristodýlidistiń aitýynsha, aqparattyq-kommýnikatsiialyq tehnologiialar, finteh, investitsiialyq qorlar, keme qatynasy, týrizm, bilim berý, jańartylatyn energiia kózderi men infraqurylym eki el arasyndaǵy yntymaqtastyqtyń negizgi baǵyttaryna ainalýy múmkin.
Kelissóz barysynda taraptar saýda jáne investitsiia, kólik-logistika, tsifrlyq kommýnikatsiialar, jasandy intellekt pen qarjy salalaryndaǵy yqpaldastyqty tereńdetý máselelerin talqylady. Sonymen qatar mádeniet, bilim, sport jáne týrizm baǵyttaryndaǵy bailanysty keńeitýge erekshe nazar aýdaryldy.
Kezdesý qorytyndysynda Qasym-Jomart Toqaev 2028 jylǵa deiingi Ekonomikalyq yntymaqtastyqtyń jol kartasyn ázirleýdi usynyp, Ekonomikalyq yntymaqtastyq jónindegi úkimetaralyq komissiia men Iskerlik keńes qurý bastamasyn kóterdi.
