Memleket basshysy qorǵanys ministri Rýslan Jaqsylyqovty qabyldady, dep habarlaidy Dalanews.kz.
Aqorda málimetinshe, ministr qorǵanys vedomstvosynyń biylǵy atqarǵan qyzmeti týraly esep berdi.
Jaqsylyqov:
- bólimshelerdiń jaýyngerlik daiyndyǵy men qarýly kúshter qataryna kúzgi shaqyrý naýqanynyń nátijeleri, sondai-aq áskeri qyzmettegi tártip pen qaýipsizdikti nyǵaitýǵa, áskeri qyzmetshilerdiń áleýmettik mártebesi men jalaqysyn arttyrýǵa baǵyttalǵan sharalar jóninde baiandady;
- armiianyń jaýyngerlik áleýetin kezeń-kezeńimen kóterý jáne áskerdi daiarlaýdyń jańa tásilderine kóshý máselelerine airyqsha nazar aýdarylǵanyn aitty;
- memlekettik qorǵanys tapsyrysynyń oryndalý barysyn jetkizip, áskerdiń qarý-jaraq pen tehnikanyń jańa úlgilerimen, atap aitqanda, ushqyshsyz basqarylatyn aviatsiialyq júielerimen, radioelektrondyq kúres keshenderimen jaraqtandyrylyp jatqanyn habardar etti.
Qasym-Jomart Toqaev elimizdiń bitimgerlik kontingentiniń BUU aiasynda Golan jotalarynda atqaryp jatqan qyzmeti mańyzdy ekenin atap ótti.
Kezdesý sońynda prezident – Qazaqstan Qarýly kúshteriniń Joǵarǵy bas qolbasshysy ministrge otandyq qorǵanys kásiporyndarymen ózara yqpaldastyqty jandandyrý, aýmaqtyq qorǵanys pen arnaiy operatsiia kúshterin damytý, áleýmettik-quqyqtyq jumysty kúsheitý jóninde naqty mindetter júktedi.
