Búgin Memleket basshysy Qasym-Jomart Toqaev Ǵylym kúni qarsańynda ǵalymdarmen bolǵan kezdesýinde qazirgi álemdik ahýalǵa toqtaldy, dep habarlaidy Dalanews.kz Aqordanyń baspasóz qyzmetine silteme jasap.
"Kóptegen sarapshylar dúnie júzi keiingi ondaǵan jylda bolmaǵan eń aýyr daǵdarystyń tabaldyryǵynda turǵanyn málimdedi. Alpaýyt memleketter bir-birine qarsy "tarif maidanyn" ashqan soń óndiris pen saýda tizbeginiń buzylǵany, naryqtardyń quldyrap, shikizat baǵamynyń turaqsyzdana bastaǵany baiqalady. Bul barlyq elge, sonyń ishinde Qazaqstanǵa áser etetini sózsiz. Qazir joǵary tarifter engizýge 90 kúndik moratorii jariialanǵanymen, naryqtaǵy jaǵdai óte turaqsyz. Sondyqtan biz osynaý ekonomikalyq dúrbeleńniń Qazaqstan ekonomikasyna tigizetin saldaryn joiýmen ainalysyp jatyrmyz. Alaida dúrligýge sebep joq ekenine senimdimin. Biz syn-qaterlerdiń bárin árdaiym ózimizdiń basym baǵyttarymyzdy basshylyqqa ala otyryp eńserip kelemiz. Syrtqy qolaisyz faktorlardyń yqpalyna qaramastan damýdyń dańǵyl jolyn jalǵastyra beremiz", - dedi Memleket basshysy.
Onyń aitýynsha, negizgi infraqurylymdyq jobalar men basqa da bastamalar tolyǵymen oryndalady.
"Keshe Úkimet pen jergilikti atqarýshy organdardyń is-qimyl josparyn shuǵyl aiaqtaýdy tapsyrdym. Bul qadam ósim qarqyny men investitsiia kólemin tómendetpeýdi kózdeidi. Búginde investitsiia úshin kúres údedi. Sondyqtan ábjil qimyldaýǵa tiispiz. Biz barlyq syn-qaterge daiyn bolǵanymyz jón. Jumystyń bárin baiyppen ári senimdi túrde atqarý kerek. Ózderińizge belgili, daǵdarystyń da óz qaiyry bar. Ol basshylyq qyzmettegi azamattardyń iskerlik qabiletiniń bar-joǵyn aiqyndap beredi. Sondai-aq jańa múmkindikterge jol ashady. Syrtqy ahýal túbegeili ózgergen kezeńde ulttyq ekonomikanyń ornyqtylyǵy men áleýmettik turaqtylyqty saqtaý úshin munyń mańyzy zor, – dedi Memleket basshysy.
Qasym-Jomart Toqaev ǵylymy damyǵan el kez kelgen syn-qaterge tótep bere alatynyna basa mán berdi.
Aita ketsek, keshe, 9 sáýirde Memleket basshysy Qasym-Jomart Toqaev Premer-ministr Oljas Bektenovtiń, Ulttyq bank tóraǵasy Timýr Súleimenovtiń jáne basqa da laýazymdy tulǵalardyń qatysýymen jiyn ótkizdi. Jiynda álemdik naryqtaǵy tariftik qaqtyǵystardyń saldarynan energetika resýrstary jáne negizgi taýarlar baǵasynyń quldyraýyna bailanysty el ekonomikasynda qalyptasqan ahýal qaraldy.
