Prezident "Egemen Qazaqstan" gazetine bergen suqbatynda: "Eger indet órship ketpese, 11 mamyrda tótenshe jaǵdai rejimi aiaqtalady", - dedi.
"...Jalpy, Qazaqstannyń strategiialyq baǵyt-baǵdary aiqyn. Elbasy bul másele jóninde Qaýipsizdik keńesiniń otyrysynda naqty atap kórsetti. Kez kelgen daǵdarys tyń bastamalardy týyndatady. Árine, osy kezeńnen sabaq alyp, osal tustarymyzdy jetildirýimiz kerek. Eger indet órship ketpese, 11 mamyrda tótenshe jaǵdai rejimi aiaqtalady", delingen Prezident suqbatynda.
Sondai-aq óz suqbatynda Toqaev tótenshe jaǵdai kezinde halyqtyń tap bolǵan materialdyq máselesi sheshimine de keńinen toqtaldy.
"Biz Qazaqstanda tótenshe jaǵdaidy der kezinde jariialadyq. Osyndai sharalardyń arqasynda virýstyń jappai taralýyna jol bermei, qoǵamdaǵy turaqtylyqty saqtap otyrmyz. Daǵdarysqa qarsy sharalar úshin 6 trillion teńgege jýyq qarjy bólingenin bilesizder.
Eń aldymen, jumyssyz qalǵandarǵa 42 500 teńge mólsherinde tólem jasaýdy uiǵardyq. Jalpy, 4,2 million adam bul kómekti aldy. Ony ekinshi aida da jalǵastyramyz.
Budan bólek, 1 milliondai muqtaj jan azyq-túlikpen jáne qajetti zattarmen qamtamasyz etiletin boldy. Osyndai kúrdeli kezeńde halyqqa kómek kórsetilmese, memlekettiligimizge syn emes pe?! Árine, aqsha taratyp berýmen ahýal túzelmeidi. Daǵdarys jaǵdaiynda keshendi ári júieli sharalar uiymdastyrǵan abzal. Eń aldymen, jastardy jumysqa ornalastyrý kerek. Sondyqtan 250 myńnan astam jumys orny ashylady. Ár óńirde infraqurylymdyq jáne injenerlik jobalar, turǵyn úi-kommýnaldyq sharýashylyq nysandary bar. Mine, jumyssyz qalǵandardy solardyń qurylysyna, jóndeý jumystaryna jumyldyrýdamyz", - dedi Prezident.
Prezident tapsyrmasy boiynsha, kásipkerler qaýymyn tótenshe jaǵdaidan soń jeńildetilgen nesiemen qamtamasyz etý jaǵyn Úkimet qarastyryp ta qoiypty.
"Ýaqytsha qiyndyqqa tap bolǵan 1,6 million kásipkerdiń nesiesin qaitarý merzimi keiinge shegerildi. Mundai shara isker azamattardy qoldaý úshin qajet.
Sondai-aq "Qarapaiym zattar ekonomikasy" baǵdarlamasynyń qarjysy 1 trillion teńgege deiin kóbeitildi. Bul qarajat jańa jobalardy qaita qarjylandyrýǵa, jeńildik sharttarymen nesie berýge jumsalady.
Kásipkerler úshin salyqtar men basqa da mindetti tólemder merzimi uzartyldy. Zardap shekken shaǵyn jáne orta biznes ókilderi eńbekaqy tóleý qorynyń mindetti tóleminen alty aiǵa bosatyldy", - dedi Toqaev.
Aita ketsek, koronavirýstyń taralýyn aldyn alý maqsatynda jariialanǵan elimizdegi tótenshe jaǵdai aldynda 16 sáýirden 11 mamyrǵa deiin uzartylǵan bolatyn.
