Prezident Qasym Jomart Toqaev IýNESKO-nyń burynǵy bas direktory Odre Azýlege Qoja Ahmet Yasaui ordenin tabystady, dep habarlaidy dalanews.kz.
Aqorda málimetinshe, Memleket basshysy Odre Azýleniń IýNESKO-daǵy qyzmetine joǵary baǵa berip, onyń uiymdy halyqaralyq dialog pen yntymaqtastyqtyń mańyzdy alańyna ainaldyrýdaǵy rólin atap ótti.
«Sizdiń dana ári myqty basshylyǵyńyzdyń arqasynda IýNESKO dialog pen yntymaqtastyqtyń odan da mańyzdy alańyna ainaldy. Jahandyq turaqsyzdyq pen qaqtyǵystar jaǵdaiynda Sizdiń únińiz bilim men mádeniettiń beibitshilikti qamtamasyz etýdegi basty qural ekenin únemi eske salyp otyrdy. Qazaqstannyń bai tarihi jáne mádeni murasyna degen shynaiy yqylasyńyz seriktestigimizdi jańa deńgeige kóterdi», – dedi Prezident.
Memleket basshysy Odre Azýleniń Qazaqstannyń tarihi jadysyn, mádeni qundylyqtary men ziiatkerlik murasyn halyqaralyq deńgeide tanytýǵa qosqan úlesin erekshe atap ótti.
«IýNESKO bastamalary men baǵdarlamalarynyń arqasynda álemdik qaýymdastyq Qazaqstannyń biregei órkeniettik murasyn tereńirek tanydy. Qoja Ahmet Iasaýi kesenesinen bastap Uly dalanyń mádeni landshafttaryna deiingi qundylyqtar keńinen nasihattaldy. Sondyqtan Sizge Qoja Ahmet Yasaui ordenin tabystaý men úshin zor mártebe. Siz Qazaqstan úshin, ásirese elimiz úshin erekshe mańyzy bar Iasaýi kesenesine qatysty kóp eńbek sińirdińiz», – dedi Toqaev.
Óz kezeginde Odre Azýle marapat úshin alǵys aityp, Qazaqstandaǵy alǵashqy jumystary Qoja Ahmet Iasaýi kesenesin qoldaýmen bailanysty bolǵanyn jetkizdi.
«Prezident myrza, kórsetilgen qurmet úshin shynaiy alǵysymdy bildiremin. Meniń Qazaqstandaǵy alǵashqy qadamdarym Qoja Ahmet Iasaýi kesenesin qoldaýmen bailanysty boldy. Men bul orynnyń tek tarihi emes, rýhani mańyzyn da sezindim. Sondyqtan uly oishyldyń qurmetine qurylǵan jańa ordenniń iegeri ataný men úshin úlken mártebe», – dedi ol.
