Memleket basshysy Bala quqyqtary jónindegi ýákil Dinara Zákievany qabyldady, dep habarlaidy Dalanews.kz.
Qasym-Jomart Toqaevqa bala quqyqtaryn qorǵaý jáne jas urpaqtyń densaýlyǵyn saqtaý men nyǵaitý baǵytynda atqarylǵan jumystar týraly málimet berildi.
Keiingi eki jylda balalardyń quqyqtaryn qorǵaý jáne qaýipsizdigin qamtamasyz etý, zorlyq-zombylyqtyń, sýitsidtiń jáne jasóspirimder arasyndaǵy qylmystyń aldyn alý maqsatynda birqatar shara qabyldanyp, baǵdarlamalar men zańdar ázirlendi. Bul jumys aiasynda Bala quqyqtary jónindegi ýákildiń bastamasymen zańnamaǵa 120 túzetý engizildi.
Dinara Zákieva biyl 13 óńirdegi jáne 73 eldi mekendegi ahýalǵa monitoring júrgizilgenin, sonyń ishinde 272 mekemedegi balalarǵa jasyryn saýalnama jasalǵanyn, 173 otbasyda tárbielenip jatqan jetkinshekterdiń jaǵdaiymen tanysqanyn aitty. Tekseris qorytyndysy boiynsha bala quqyqtaryn qorǵaýǵa qatysty qabyldanǵan zań normalaryn buzǵan 171 derek anyqtalǵan.
Budan bólek aimaqtardaǵy 112 otbasylyq qoldaý ortalyǵynyń tiimdi jumys istep jatqany belgili boldy. Olar turmystyq zorlyq-zombylyqtyń aldyn alý men balalar quqyǵyn qorǵaý maqsatynda ashylǵan bolatyn.
Oblys ákimdikteri janynan bala quqyqtaryn qorǵaý jónindegi basqarma qurý jumystary qolǵa alyndy. Sondai-aq balalardy qorǵaýǵa jaýapty óńirlik organdardyń mindetteri men mártebesin aiqyndaityn zań jobasy daiyndalyp jatyr.
Buǵan deiin Memleket basshysy qabyldanǵan zańdardy iske asyrý jóninde mindet júktegen edi. Bala quqyqtary jónindegi ýákil Prezident tapsyrmasynyń oryndalý barysy týraly baiandady. Atap aitqanda, erekshe qajettilikteri bar balalardy damytý men ońaltý ortalyqtaryn qurý jumystaryn jandandyrýǵa toqtaldy. Qazirgi kezde "Qazaqstan halqyna" qory seriktesterimen birge 49 ońaltý ortalyǵyn ashty. Bul mekemelerde erekshe qajettilikteri bar balalarǵa qyzmet kórsetiledi.
Sonymen qatar, kezdesýde "Qazaqstan balalary" baǵdarlamasyn ázirleý, onlain qaýipsizdikti qamtamasyz etý jáne kámeletke tolmaǵan azamattardyń jeke málimetterin qorǵaý máseleleri talqylandy.
Prezident bala quqyqtaryn qorǵaýǵa kepildik berý júiesin nyǵaityp, jetkinshekterdi jan-jaqty qoldaý tetigin qalyptastyrý úshin jergilikti atqarýshy organdar men óńirlik ýákilderdiń kúsh-jigerin jumyldyrý mańyzdy ekenine nazar aýdardy. Budan bólek, mektepterdegi inkliýzivti bilim berý isin damytýdy kózdeitin qosymsha sharalar qabyldaýdy tapsyrdy.
