Memleket basshysy Qasym-Jomart Toqaev «Qazaqtelekom» AQ basqarma tóraǵasy Baǵdat Mýsindi qabyldady, dep habarlaidy Dala news.
Aqordanyń málimetinshe, kezdesý barysynda Prezidentke kompaniianyń qyzmeti jáne sońǵy eki jylda júzege asyrylǵan negizgi infraqurylymdyq jáne tehnologiialyq jobalardyń nátijeleri týraly baiandaldy.
Baǵdat Mýsinniń aitýynsha, búginde «Qazaqtelekom» 1,75 millionnan astam úi sharýashylyǵyna qyzmet kórsetedi. Kompaniia el aýmaǵynda talshyqty-optikalyq jelini júieli túrde keńeitip, telekommýnikatsiia naryǵynyń negizgi segmentterinde kóshbasshylyq ornyn saqtap otyr.
Sondai-aq eldi mekenderdi sapaly bailanyspen qamtý jumystary jalǵasýda. Jospar boiynsha 2027 jyldyń sońyna deiin halqy 1 millionnan asatyn 3 myńnan astam aýyl sapaly bailanys qyzmetimen qamtamasyz etiledi.
Kezdesýde «Kaspii TOBJ» halyqaralyq jobasynyń júzege asyrylýy týraly da aityldy. Joba Aqtaý – Sýmgait baǵyty boiynsha sýasty talshyqty-optikalyq bailanys jelisin salýdy kózdeidi. Bul bastama Qazaqstannyń tranzittik áleýetin arttyryp, Eýropa men Aziia arasynda jańa tsifrlyq dáliz qalyptastyrýǵa múmkindik beredi.
Sonymen qatar derekterdi óńdeý infraqurylymyn damytý máselesi talqylandy. Ekibastuz qalasynda «Derekterdi óńdeý ortalyǵy alqaby» strategiialyq jobasy aiasynda qýaty kezeń-kezeńimen ulǵaitylatyn zamanaýi ortalyq salynyp jatyr.
Baǵdat Mýsin jasandy intellekt tehnologiialaryn engizýge basymdyq beriletinin aitty. Kompaniia korporativtik protsesterdi avtomattandyrýǵa arnalǵan JI-agentterdi ázirleý, kiberqaýipsizdik sheshimderin jetildirý jáne memlekettik sektordy tsifrlandyrý baǵytynda birqatar jobany iske asyrýda.
Óz kezeginde Prezident shaǵyn qalalar men aýyldardy sapaly bailanys jáne internetpen qamtamasyz etýdiń mańyzyn atap ótti. Sondai-aq tsifrlandyrý men jasandy intellekt salalaryndaǵy investitsiialyq jobalardy ýaqytyly júzege asyrýdy tapsyrdy.
