Qazaqstan Prezidenti Qatar ámiri sheih Támim ben Hamad Ál Tánimen kezdesti, dep habarlaidy dalanews.kz.
Qasym-Jomart Toqaev Qatar ámiri sheih Támim ben Hamad Ál Tánige jáne onyń áýletine Ámir-Áke sheih Hamad ben Halifa Ál Táni dúnieden ozýyna bailanysty kóńil aitý úshin Dohaǵa bardy. Prezident qýatty ári órkendegen Qatar Memleketin qurýǵa sheih Hamadtyń eleýli úles qosqanyn atap ótti.
"Ol kórnekti memleket qairatkeri ári qazaq halqynyń dosy edi", – dedi Qasym-Jomart Toqaev.
Memleket basshysynyń aitýynsha, qazaq-qatar qarym-qatynasynyń qalyptasyp, tabysty damýyna sheih Hamad ben Halifa Ál Táni zor eńbek sińirdi. Ol Qazaqstanǵa eki ret resmi saparmen keldi. Ámirdi 1999 jyly sáýirdegi birinshi sapary kezinde Qasym-Jomart Toqaev syrtqy saiasat vedomstvosynyń basshysy qyzmetinde qarsy alǵan. Memleket basshysy sheih Hamadtyń qoldaýymen Astanada alǵashqy eńseli ál-Farabi meshiti boi kótergenin, sondai-aq, Qazaqstan táýelsizdiginiń bastapqy jyldarynda birqatar áleýmettik jáne infraqurylymdyq joba júzege asqanyn rizashylyqpen eske aldy.
"Osyndai qaraly sátte Alla Taǵaladan marqumnyń jany jánnatta bolýyn surap, duǵa etemiz", – dedi Qazaqstan Prezidenti.
Qatar ámiri sheih Támim ben Hamad Ál Táni arnaiy qoldaýy úshin Qasym-Jomart Toqaevqa rizashylyǵyn bildirip, bul Qatar men Qazaqstan halyqtary arasyndaǵy baýyrlastyq bailanystardyń airyqsha sipatyn kórsetetine nazar aýdardy.
Qatar tarapynyń bastamasymen memleketter basshylary qazirgi halyqaralyq ahýal, sonyń ishinde Taiaý Shyǵystaǵy jaǵdai týraly pikir almasty. Prezident Qatar ámirin ózine qolaily ýaqytta Qazaqstanǵa saparmen kelýge shaqyratynyn rastady. Sheih Támim ben Hamad Ál Táni shaqyrýdy yqylaspen qabyl aldy.
