Prezident Qasym-Jomart Toqaev AMANAT partiiasy men jańa «Ádilet» partiiasynyń birigýin tarihi sheshim dep baǵalap, bul qadam eldegi reformalarǵa jańa serpin beretinin málimdedi, dep habarlaidy dalanews.kz.
Memleket basshysy Parlament palatalarynyń birlesken otyrysynda AMANAT partiiasynyń múshelerine alǵys bildirdi.
«Erekshe alǵysymdy AMANAT partiiasynyń fraktsiiasyna jáne barlyq múshelerine bildirgim keledi. Sizder belsendi ári jasampaz ustanymdaryńyzben naǵyz patriotizm men azamattyq jaýapkershiliktiń úlgisin kórsetip kelesizder. Jýyrda ótken partiia sezinde jańa «Ádilet» partiiasyna qosylý týraly asa mańyzdy strategiialyq sheshim qabyldandy. Men bul shyn máninde tarihi qadamdy tolyq qoldaimyn ári quptaimyn. Barlyq progressivti qoǵamdyq-saiasi kúshterdiń jalpyulttyq qundylyqtar men maqsattar tóńireginde toptasýy elimizde júzege asyp jatqan túbegeili reformalarǵa tyń serpin beredi. Túptep kelgende, bárimizdiń maqsatymyz bir – jas urpaqqa jarqyn bolashaqqa jol ashatyn órkenietti ári ozyq memleket qurý», – dedi Qasym-Jomart Toqaev.
Prezidenttiń aitýynsha, Qazaqstan azamattarynyń jalǵyz Otany – Qazaqstan, sondyqtan eldiń bolashaǵy óz qolymyzda.
«Bizdiń Qazaqstannan basqa Otanymyz joq. Sondyqtan elimizdiń tabysty damýyn tek ózimiz ǵana qamtamasyz ete alamyz. Eger birtutas ult bolyp jumyla bilsek, kez kelgen belesti baǵyndyryp, aldymyzǵa qoiǵan barlyq maqsatqa jetemiz. Biz qasietti Táýelsizdigimizdiń tuǵyryn nyǵaityp, Ádiletti, Qýatty, Qaýipsiz, Taza ári Ozyq Qazaqstan quramyz. Men buǵan nyq senemin. Osy jolda aianbai eńbek etý – árbir azamattyń perzenttik paryzy. Elimizde árdaiym beibitshilik pen bereke ornasyn! Otanymyz máńgi jasai bersin!» – dep túiindedi Memleket basshysy.
