Qasym-Jomart Toqaev Almaty qalasynyń ákimi Erbolat Dosaevty qabyldady, – dep habarlaidy Dalanews.kz.
Memleket basshysyna Almatynyń biylǵy qańtar-aqpan ailaryndaǵy áleýmettik-ekonomikalyq damýynyń aldyn ala qorytyndylary jáne qalany órkendetýdiń perspektivasy baiandaldy.
Erbolat Dosaevtyń aitýynsha, bul kezeńde qysqa merzimdi ekonomikalyq indikator 7 paiyzǵa deiin artqan, jyl qorytyndysy boiynsha óńirlik jalpy ónim 6,4 paiyzǵa ósedi dep boljanyp otyr.
Prezident tapsyrmasyna sáikes Almatyda ekonomikany ártaraptandyrý jáne investitsiia tartý jumystary jalǵasyp jatyr.
Qala ákiminiń aitýynsha, jyl sońyna deiin quny 450 milliard teńgeden astam qarajatqa 33 jańa investitsiialyq joba iske asyrylady. Biyl jalpy investitsiia kólemi 2,2 trillion teńgege jetip, ótken jylmen salystyrǵanda 10 paiyzǵa artady.
Almaty ákimi Memleket basshysynyń bastamasymen qolǵa alynǵan, qorshaǵan ortaǵa uqypty qaraý mádenietin qalyptastyratyn «Taza Qazaqstan» baǵdarlamasynyń oryndalýy jaiynda málimet berdi. Aýlalar, kóshe-jol jelileri men jasyl aimaqtardy keshendi túrde kútip, baptaý úshin úsh jyldyq kelisimshart tásili engizildi.
Prezident buǵan deiin shahardyń ekologiialyq jaǵdaiyn jaqsartý, jyl sońyna deiin qaladaǵy qoǵamdyq kólikterdi ekologiialyq talapqa tolyq sai etý, sondai-aq, Almatynyń kólik qurylymyn qalyptastyrý boiynsha tapsyrma bergen bolatyn. Kezdesýde osy jumystardyń nátijeleri baiandaldy.
Qasym-Jomart Toqaev Erbolat Dosaevqa ekologiia máselesine den qoiyp, injenerlik jáne áleýmettik infraqurylymdy jańǵyrtý, jyl sońyna deiin sapaly syrtqy jaryqtandyrýmen qamtamasyz etý mindetin júktedi. Sondai-aq, Almatynyń ornyqty damýyna qatysty bergen tapsyrmalaryn muqiiat oryndaý qajet ekenin aitty.
