Memleket basshysy Qasym-Jomart Toqaev qazaqstandyqtardy Abai kúnimen quttyqtady, dep habarlaidy dalanews.kz.
Prezident uly oishyldyń shyǵarmashylyq jáne ziiatkerlik murasy álemdik jáne ulttyq mádeniettiń mańyzdy bóligi ekenin atap ótti.
Memleket basshysy Abaidyń halyqty beiqamdyq pen jalqaýlyqtan arylyp, bilimge, eńbekke jáne rýhani kemeldenýge umtylýǵa shaqyrǵanyn aitty. Onyń pikirinshe, aqynnyń «Tolyq adam» tujyrymy ár azamattyń rýhani turǵydan jetilýine úndeitin ózekti ideia bolyp qala beredi.
Toqaev biylǵy Abai kúni Qazaqstanda júrgizilip jatqan aýqymdy ózgerister kezeńimen tuspa-tus kelip otyrǵanyn atap ótti. Prezidenttiń aitýynsha, Qazaqstannyń jańa Konstitýtsiiasy zańdy kúshine enip, memlekettik bilik institýttaryn jańǵyrtý protsesi bastaldy. Sonymen qatar el tarihynda alǵash ret Quryltai sailaýy ótetinine toqtaldy.
Prezident qazirgi ózgeristerdiń negizgi maqsaty azamattardyń boiyna jasampazdyq qundylyqtaryn sińirip, eldiń damýyna jańa serpin berý ekenin jetkizdi.
Memleket basshysy Qazaqstanda jańa qoǵamdyq etikany qalyptastyrý, ulttyq biregeilikti nyǵaitý jáne gýmanistik qundylyqtardy dáripteý isinde Abai murasyna únemi júginetinin aitty. Onyń sózinshe, uly aqyn bilimge qushtarlyq, eńbekqorlyq pen jaýapkershiliktiń halyq bolashaǵy úshin mańyzdy ekenin túsindirip, eldi birlik pen kelisimdi saqtaýǵa úndegen.
Prezident Abaidyń qara sózderindegi taǵylym qazirgi Qazaqstannyń qundylyqtarymen úndesetinin atap ótti. Ol «Adal Azamat», «Taza Qazaqstan», «Zań men Tártip» ideialaryn Abai armandaǵan qoǵamnyń negizderi retinde atady.
Toqaev uly oishyldyń murasy óskeleń urpaqty otanshyldyq pen týǵan elge degen súiispenshilik rýhynda tárbieleýge aldaǵy ýaqytta da qyzmet etetinine senim bildirdi.
